Ақтауда дзюдодан халықаралық оқу-жаттығу жиыны өтіп жатыр

Тұрар Жолдыбаев атындағы дзюдо орталығында Армения елінің, Атырау мен Маңғыстау облысының дзюдошылары біріккен оқу-жаттығу жиынын өткізіп жатыр, - деп хабарлайды mangystaumedia.kz сайты.

Оқу-жаттығу жиыны барысында Армения және қазақстандық татами шеберлері тәжірибе алмасып, біліктіліктерін арттырмақ. 100-ге жуық спортшы екі апта бойы шеберліктерін шыңдайтын болады. Әр жақтан жиналған кіл мықты күніне 2 мезгіл боз кілемде жаттығады.

Дзюдодан Маңғыстау облысының жастар құрамасының аға жаттықтырушысы Қайрат Бурбасов пен облыстық ересектер құрамасының аға бапкері Айбек Имашев жаттығу жиынын ұйымдастыруда өңір жастарын ел біріншілігіне пысықтауды мақсат еткен. Облыстық спорт басқармасы мен дзюдо федерациясының президенті Асылбек Жолдыбаев халықаралық жаттығу жиынының өтуіне мұрындық болып отыр.

- Қазақстандық дзюдошылармен бірге жаттығу – бұл үлкен мүмкіндік. Қазақстанның дзюдо мектебі өте жақсы дамығанын бәріміз білеміз. Сол себепті біз Қазқстандағы оқу-жаттығу жиынына қатысқымыз келді. Мұндағы жігіттердің барлығы мықты. Біздің спотшыларымыздың күштілермен белдескені үлкен құрмет. Жаттығу өте жақсы өтіп жатыр. Осындай жақсы жаттығу жиынын ұйымдастырғаны үшін Қайрат Бурбасов пен Айбек Имашевқа үлкен алғысымды білдіргім келеді, - дейді Армения ұлттық құрамасының бас жаттықтырушысы Ованес Давтян.

Ованес Давтянның айтуынша, армениялық дзюдошылар осы айдың соңында Армения чемпионатына қатысады. Ақтауда өтіп жатқан жиын олардың чемпионат алдындағы жаттығуы.

Жаттығу жиынына әртүрлі салмақтағы Армения чемпиондары, Атырау облысынан Қазақстан бойынша жоғары нәтиже көрсетіп жүрген дзюдошылар келген. Ал Маңғыстаудан ұлттық құрама қатарындағы өңірдегі жетекші дзюдошылар мен байрақты бәсекелердің жүлдегерлері қатысып жатыр.

- Наурыз айында болатын жастар арасындағы Қазақстан чемпионатына дайындалып жатырмыз. Ұлттық құрамадығы дзюдошыларымыз жақсы тәжірибе алмасып жатыр. Армениялықтар мен біздің елдің спортшыларының күресу мәнерінде айырмашылық бар. Сол үшін көбірек тәжірибе алмасу керек деп ойлаймын. Өйткені алдағы уақытта біздің дзюдошыларымыз еуропалықтармен үлкен додаларда кездеседі. Енді шыңдалып келе жатқан жас спортшыларымыз үшін жаттығу жиынының берер пайдасы мол, - дейді Атырау облыстық дзюдодан ересектер құрамасының аға бапкері Құлбаев Рашид.

Сондай-ақ, үш құраманың бапкерлері жастардың тәжірибесін шыңдап қана қойма, өзара біліктіліктерін жетілдіріп жатыр.

Айта кетейік, Маңғыстауда бұндай оқу-жаттығу жиыны алғаш рет ұйымдастырылып отыр. Бұдан соң халықаралық деңгейдегі оқу-жаттығу жиынының өңірдегі дзюдо күресіне жаңа серпін әкелетініне үміт зор.

Махаббат НҰРЖАНҚЫЗЫ

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.