Бейнеу ауруханасы жаңа құрылғымен толықты

Бейнеу ауруханасы «BiliCare» жаңа құрылғымен толықты. Бұл құрылғы арқылы нәрестенің билирубин деңгейін анықтауға болады, - деп хабарлайды mangystaumedia.kz сайты.

Диагностикалық мақсатта қолдануға жеңіл медициналық аппаратты Біріккен Араб Әмірлігінің «Сейф және Сурур Бин Мухаммад Аль Нахиян» қайырымдылық ұйымы сыйға тартты. Медициналық аппараттың құны – 3 500 000 теңге.

Маңғыстау облысы денсаулық сақтау басқармасының баспасөз қызметінің айтуыша, бейнеуліктер нәрестенің сарғаю деңгейін анықтау үшін емханадағы лабораторияға барып, қан тапсыратын еді. Енді бұл құрылғы тұрғындар үшін тиімді болмақ.

«Баланың сарысын анықтайтын құрылғы ауруханадағы 4 бөлімнің біреуіне берілді. Алдағы уақытта қалған бөлімдерді де жабдықтау жоспарда бар. Ранскутандық билирубинометр атты «BiliCare» құрылғысы инвазивті емес, жаңа туылған нәрестелердегі билирубин деңгейін тері бетінен, теріні зақымдамай, нәрестеге ауру сезімін тудырмай анықтайды. Бейнеу аудандық аурухана басшылығының атынан демеушілерге алғыс білдіреміз» - , дейді аудандық аурухана қызметкерлері.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.