Бейнеуде кешенді клиника ашылды

Тұңғыш Президент күні қарсаңында Бейнеу ауданы жаңа мединициналық кешенмен толықты. Бейнеу ауданының тұрғыны, Тәуелсіздік құрдасы Сүлейменов Нұрболат Дәрібекұлы есімді азамат ауданның медицина саласын дамытуды мақсат етіп, «ND clinic» атты жеке клиникасын ашты, деп хабарлайды mangystaumedia.kz.

Клиниканың ашылу салтанатына аудан әкімі Әбілов Бейнеубек Көңілімқосұлы арнайы келіп құттықтады. Сонымен бірге ауыл ақсақалы Алдашев Алдияр, Нұр-Сұлтан қаласынан келген медицина ғылымдарының докторы, жоғары санатты нефролог дәрігері Нарманова Орынгүл Жақсыбайқызы және аудандық орталық аурухананың бас дәрігері Абдуллаев Берік Алдоңғарұлы халыққа адал қызмет ететін пайдалы да табысты кешен болсын деп тілектерін жеткізді.

Қазіргі таңда клиника аудан тұрғындарына хирург, педиатр, невропатолог дәрігерлері кеңестері мен ультра күлгінді қан тазалау кабинеті, емшара кабинеті және сауықтыру массаждары сияқты медициналық қызметтерін ұсынып жатыр. Алдағы уақытта лор, окулист, терапевт, кардиолог дәрігерлер кеңестері мен ультра дыбыстық зерттеу аппараттары іске қосылатын болады.

"Кіндік қаным тамған жерге маңдай терім сіңсін деген ниетпен әрі Тәуелсіздіктің төл құрдастары атынан сыйымыз деп ашылған кешенді клиника бүгінде 17 адамды жұмыспен қамтып отырмыз" - деді Нұрболат Дәрібекұлы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.