© Сайт архивінен
Бейнеу ауылы халық саны бойынша республикадағы ауылдар арасында алдыңғы орынды иеленді.
Тоғыз жолдың торабына орналасқан Бейнеу ауылының іргетасы 1916 жылы қаланған. 1973 жылдан бері Бейнеу ауданының орталығы болып келеді.
Қазіргі таңда ауылдағы тұрғындардың саны - 56 348 адам. Халықтың басым бөлігі бюджеттік сала мен темір жол қызметінде жұмыс істейді. Шағын кәсіпкерлікпен, мал шаруашылығымен айналысады. Сондай-ақ өндірістік мекемелерде, мұнай және газ компанияларында, ұлутас карьерлерінде еңбек етеді.
-Ауылымыздың халық саны жыл сайын артып келеді. Қазіргі таңда ауылда 11 мектеп, 10 бөбекжай, 2 колледж және аурухана тұрғындарға қызмет көрсетуде. Жыл сайын ауылдың әлеуметтік-экономикалық жағдайын жақсартуға бағытталған шаралар, атап айтқанда, көркіне көрік қосқан сәулет ескерткіштері, мәдени-спорттық кешендер бой көтеріп, жарықтандыру, абаттандыру, асфальт төсеу, тазалық жұмыстары жүргізіліп, үнемі даму үстінде. Бүгінде ауылымыз халық саны бойынша республикадағы басқа ауылдардың арасында алдыңғы орынды иеленді, - деді ауыл әкімі Расул Тайшыбаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
