Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
©
Арайлап атқан ақ таң мен қызарып батқан әр күнімізге шүкіршілік етеміз. Бақытымыздың бастауы, тыныш ұйқы мен уайымсыз күлкі тәуелсіздігімізбен байланысты. Тәуелсіздік әркімге бұйыра бермейтін бақ. Тәуелсіздік жолы оңай жол емес, бұл жолда сан мыңдаған адамның арманы мен тағдыры тәлкекке түсті. Біздің еліміз бүгінгі күнге сондай қиын-қыстау, даңқты жолдардан өтіп отыр. Елбасымыз Н.Назарбаев өзінің «Ғасырлар тоғысында» атты еңбегінде «1986 жылғы Желтоқсан оқиғасы қазақ жастарының сана-сезімінің қаншалықты ұлтжанды екендігін көрсетті. Олар 100 жылға жуық уақыт бойы халықты казармалық тәртіпте ұстап келген тоталитарлық жүйеге бірінші болып қарсы шықты. Жастар бұдан әрі кез-келген ұлтқа, ұлттың мақтаныш сезімін қорлауға жол бермейтінін өз халқының атынан ашық мәлімдеді» деп жазды.
Желтоқсанның ызғарлы оқиғасын еске алғанда сыздамайтын жүрек жоқ шығар, сірә... 1982-1987 жылдары Алматы шетел тілдері педогогикалық институтының студенті едім. Желтоқсан оқиғасын өз көзімізбен көрдік, оқиғаға қатысушыларға неше түрлі озбырлықтар жасалды. Ер азаматтарды жүк машиналарына тиеп, қаланың шетінде орналасқан мал қораларға қамау, мұздай су шашу, суретке түсіріп, оқудан шығару сияқты әрекеттерге куә болдық. Дегенмен жастардың патриоттық сезімдері жоғары еді. Өзімнің жолдасым Марат Сүйеуов те желтоқсан оқиғасының куәгері. Желтоқсан оқиғасы ерді де, қызды да аямады. Алаңға тек ер жігіттер ғана емес, қайсар мінезді, батыл нәзік жандылардың қатысқаны баршамызға мәлім. Олар қиын кезде бұлыңғыр саясаттың соңында кетпеді. Елі, жері үшін соңына дейін күресті.
Оқи отырыңыз: Көзді қалай күту керек?Тәуелсіздік үшін жас өмірін құрбан еткен сол кездегі жалынды жастарымыздың қажырлы қайраты мен жастық тегеуріні нәтижесінде тоталитарлық құрсаудың тоңы жібіп, Тәуелсіздік таңы атты. Сондықтан да тәуелсіздігіміздің мәні өзгеше, бағасы теңдесіз. Ендеше тәуелсіздігіміздің тұғыры әрқашан биік болсын. Тәуелсіз елдің жастарына ұлттық рух, Отанды сүйетін, білімді, тілін қадірлей білетін ұрпақ болуын тілеймін.
Cәуле БУСАХАНОВА, Желтоқсан оқиғасының куәгері
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.