ҚР Президентінің 2022 жылғы 5 мамырдағы Жарлығымен Ата заңға енгізілетін түзетулер мен өзгертулер бойынша референдум өтпек. Облыстық қоғамдық штаб мүшелері маңғыстаулықтарды аталған шараға белсене қатысуға шақырды, - деп хабарлайды mangystaumedia.kz сайты.
Қоғамдық штабтың төрағасы, “Инвесторлар қауымдастығы “Caspian investments” заңды тұлғалар бірлестігінің басқарма төрағасы Бекмұрат Жүсіповтың айтуынша, Референдум нәтижесінде қазіргі конституциядағы 30-дан астам заңға жаңа өзгеріс енгізілмек. Бұл түзетулер саяси жүйені қайта құру үшін көптен күткен шараларды қамтып, қоғамның мемлекетпен өзара іс-қимылы форматтарын жаңартуға деген сұранысын арттырмақ.
- Конституциялық реформаның ережелері әртүрлі қоғамдық күштердің, сарапшылар мен азаматтық белсенділердің бастамаларына негізделгені маңызды, сол себепті Маңғыстау облысы азаматтық қоғамының белсенді өкілдері, референдумды қоғамдық қолдаудың облыстық штабына топтастық - деді облыстық қоғамдық штабтың төрағасы Бекмұрат Жүсіпов.
Сондай-ақ, қоғамдық штаб мүшесі Оңайбек Нұрасылұлы Қазақстанның әрбір азаматы Конституцияға өзгерістер енгізу қажеттілігі туралы өз пікірін білдіруге құқылы екенін жеткізді.
- Президенттің Конституцияға ұсынылатын түзетулерді референдум шеңберінде бүкілхалықтық дауыс беру арқылы шығарған шешімін қолдаймыз, сіздерді де қалыс қалмауға шақырамыз. Өйткені Жаңа Қазақстанды құру біздің өз қолымызда, - деді Оңайбек Нұрасылұлы.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
