Тәуелсіздік құрдасы спорт шеберлерін дайындап жүр

Тәуелсіздік алған 30 жыл ішінде Қазақстанның спорттағы қол жеткізген табыстары аз емес. Егемен елдің спорттағы жетістіктерін еселеп жүргендердің қатарында тәуелсіздікпен тел өсіп келе жатқан саңлақтарымыз да бар. Солардың бірі Шетпе ауылының тұрғыны Жанғали Нұрдәулетов. Ол самбо күресінен Қазақстан Республикасының спорт шебері, бірінші санаттағы жаттықтырушы, самбо және дзюдодан ұлттық дәрежедегі төреші. Тәуелсіздікпен түйедей құрдас Жанғали жастайынан өмірін спортпен байланыстырып, біршама жетістіктерге жеткен.

- Тәуелсіздік құрдасы болу - үлкен жауапкершілікті жүктейді. Салауатты өмір салтын жаныма серік етіп ауыл жастарын спортқа тартып, көк туды шет мемлекеттерде көтеруді мақсат етіп келемін. Осы бағытта 7 жылдан бері дзюдо мен самбо күресінен жеңімпаздарды дайындап, жаттықтырып жүрмін - , дейді Жанғали Нұрдәулетов.

Шәкірттерінің арасынан осы күнге дейін бірнеше ел біріншілігінің чемпиондары, 10-нан астам халықаралық турнирдің жеңімпаздары шықты. Қазір 9-18 жас аралығындағы 30 жасөспірімді додаға қосу үшін еңбектеніп жатыр.

- Қазақстанның өзге елдермен иық тірестіре түрлі жетістікке жетіп, белестерді бағындыруы — тәу етер Тәуелсіздіктің арқасы. Бүгін де өзінің туған жылын осы қасиетті ұлық мерекемен байланыстырып, мақтанады. Мен де Тәуелздік құрдасы болғанымды мақтан тұтамын - , деді Жанғали Нұрдәулетов.

Жанғали Маңғыстау ауданы, Шетпе ауылында өмірге келген. Берекет Жұмалиев атындағы орта мектептің, Ақтаудағы Есенов атындағы университеттің түлегі. Отбасындағы 4 баланың кенжесі. Әкесі Нұрболат Нәрдәулетов мәдениет саласының үздігі, анасы тігіншілікпен айналысады. Жанғали спортпен 7 сыныпта жүргенда айнылыса бастаған. Бапкері Манарбек Бисекенов. Бүгінде Жанғали үш бала тәрбиелеп отырған әке, жолдасы мұғалім қызметінде.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.