Республика күні қарсаңында Бейнеу ауданындағы Сыңғырлау және Тәжен ауылында шағын футбол алаңы ел игілігіне берілді, деп хабарлайды mangystaumedia.kz аудан әкімдігінің баспасөз қызметіне сілтеме жасап.
Жаңадан салынған футбол алаңы облыстық бюджет есебінен қаржыландырылған. Сыңғырлау және Тәжен ауылындағы алаңның жалпы ауданы 800 шаршы метрді құраса, сыйымдылығы 30 адамға дейін жетеді.
Спорттық алаңдарға жасанды көгал төселген. Спорт нысанының жан-жағы арнайы қоршаумен қоршалып, толық түрде абаттандырылды. Ашылу салтанатына аудан әкімінің орынбасары Рахымжан Шалбаев пен мәслихат хатшысы Қуан Мансұров және ауыл ақсақалдары мен спортшылары қатысты.
«Ауданымызда бұқаралық спортқа баса көңіл бөлінуде. Соның арқасында 2 ауылда жаңа футбол алаңы салынып отыр. Бұл ауыл балалары мен футбол құрама командалары үшін өте қажетті нысан еді. Енді міне бұл мәселе де шешімін тапты. Жаңа футбол алаңдары ауыл жастарының спортқа деген ықыласын арттырып, олардың үлкен жетістіктерге жетуіне септігін тигезеді деп сенемін»,- деді Бейнеу ауданы әкімінің орынбасары Рахымжан Шалбаев.
Аудан әкімінің орынбасары спорт алаңдарының ашылу рәсімінде өз жолын ауыл жастарына ұсынып, ашық спорт алаңы салтанатты түрде пайдалануға берілді.
Игілікті іс-шарадан соң ауыл жастары мен шекара қызметкерлерінің қатысуымен шағын футболдан жолдастық кездесу ұйымдастырылды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
