Бейнеуде тоғызқұмалақтан аудандық біріншілік өтті

Спорттық ойындардың ішінде адам баласының логикалық ойлау қабілетін арттыруға, ой-өрісін дамытуға арналған ерекше ойын түрі бар. Оның бірі - тоғызқұмалақ. Бұл ойын ең жетілген спорт түрлерінің бірі ретінде адамзатты жаңа шыңдарға жетелейтін ойы кең, рухы биік, саналы тұлғаларды тәрбиелеудің қуатты құралы бола алады. Тоғызқұмалақ – төрт мың жылдық тарихы бар, қазір әлемге әйгілі зияткерлік ойындардың ішінде ерекше маңызға ие, ата-бабамыздан қалған асыл мұраларымыздың бірі. Республиканың әр түкпірінен табылған, тасқа қашалып қалдырылған тоғызқұмалақ тақтасының бейнелері де ойынның өте ертеде пайда болғанынан хабар береді. “Тоғызқұмалақ ойыны қазақтың барлық ойынының ішіндегі ең қиыны, ойнаған адамның миы істеп, есепшілігі артып, тез тапқыштық жағы күшеймек”, - деген түркітанушы С.Аманжолов. Ұлттық спортты дамыту, оқушылар арасында тоғызқұмалақ ойынын кеңінен насихаттау, облыстық біріншілікке аудан құрама командасын жасақтау мақсатында Бейнеу аудандық балалар-жасөспірімдер спорт мектебінде "Жастар жылына" арналған тоғызқұмалақтан 2004-2006 және 2007-2009 жылы туған оқушылар арасында жекелей аудан біріншілігі өтті. Жарысқа аудандағы білім беру ұйымдарынан жетпіске жуық спортшы қатысты. Тартымды да тартысты да өткен сайыста төрешілер шешімімен жеңімпаздар анықталды. Атап айтар болсақ, 2004-2006 жылы туған ұлдар арасынан 1-орынды І.Елемесов, 2-орынды Қ.Мектепов, 3-орынды А.Нұрамбетов иеленсе, қыздар арасында 1-орын М.Қонақбаеваға, 2-орын А.Қощанға, 3-орын А.Дүйсенбаеваға бұйырды. Сондай-ақ 2007-2009 жылы туған ұлдар арасында 1-орынға С.Қалилаев, 2-орынға Е.Қалилаев, 3-орынға Д.Қаржау ие болса, қыздар арасынан 1-орынды Қ.Асанова, 2-орынды А.Мұханбетова, 3-орынды Б.Тұралы иеленіп, жеңімпаз атанды. Жарыс соңында тоғызқұмалақ үйірмесінің жаттықтырушысы Ибрай Умиркулов жүлдегерлерге дипломдарды табыстады.

Үміт ҚАЗДАЕВА