30 қараша күні Шетпе – Жетібай – Ақтау тас жолында жүк көліктерін бақылайтын жылжымалы бекет қойылды. Мобильді пост қызметкерлерінің міндеті – Бекі ауылының іргесіндегі қиыршық тас карьерлерінде жұмыс істейтін жүк көліктерінің қозғалысы мен салмағын бақылау, деп хабарлайды mangystaumedia.kz.
Маңғыстау облысы бойынша көліктік бақылау инспекциясы 19 күннің ішінде Ақтау-Жетібай-Бекі-Шетпе жылжымалы бекетінде 128 ауыр жүк көлігін тексерді. Нәтижесінде 65 хаттама толтырылып, 11 млн теңге айыппұл салынды. Оның ішінде 3 млн 800 мың теңге жолда заңмен рұқсат етілген шектен тыс жүк тасығаны үшін салынған айыппұл сомасы.
16 желтоқсан күні сағат 15:30 шамасында Маңғыстау облыстық полиция департаментінің жергілікті полиция қызметі басқармасы патрульдік полиция ротасының қызметкерлері, Маңғыстау облысының көліктік бақылау инспекциясы мен ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департамент өкілдері Бекідегі жылжымалы бекетте көліктердің құжатын тексеруге, сондай-ақ тасымалданатын жүктің салмағын анықтау үшін үш ауыр жүк көлігін тоқтатпақ болған. Аталған көліктердің жүргізушілері құзырлы орган өкілдерінің айтқанын елемей, жоғары жылдамдықпен жүре берген. Полицейлер олардың соңынан ілесіп, жылжымалы көлік бекетінің маңында жолды жауып, ауыр жүк көліктерінің жүргізушілерімен сөйлесуге тырысты. Алайда көлік жүргізушілері полицейлермен сөйлесуге қарсы болып, көлік есігін жауып алған. Осыдан кейін шамадан тыс жүк тиеп алған көлік жүргізушілері салынатын айыппұлдан қашып, артық жүкті жолға төгіп тастаған.
Маңғыстау облысы полиция департаментінің қызметкерлері «Камаз», «Шахман» және «МАЗ» маркалы үш автокөлік жүргізушілеріне қатысты әкімшілік хаттама толтырды.
Шамадан тыс жүк тиеп, заң талаптарын бұзушы көліктердің қозғалысына жол бермеу жұмыстарын күшейту үшін құзырлы мекеме өкілдері алдағы уақытта бекет маңына бейнебақылау камераларын қоюды жоспарлап отыр.
- Маңғыстау ауданы әкімдігіне жылжымалы бекет арқылы өтетін барлық көліктердің қозғалысын түсіретін, сондай-ақ бекеттегі Маңғыстау облыстық полиция департаменті ЖПҚБ ППР, Маңғыстау облысының көліктік бақылау инспекциясы мен ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департамент өкілдерінің іс-әрекетін жазып алатын бейнекамералар орнату ұсынылды. Бейнекамералар бекетте құзырлы орган қызметкерлеріне қарсылық көрсеткендер мен басқа да күтпеген жағдайларды тіркеу үшін қажет. Жылжымалы бекеттерде құзырлы орган қызметкерлерінің тәулік бойы үздіксіз кезекшілігі ұйымдастырылады. Сондай-ақ, аудан әкімдігі жылжымалы бекет жанынан айыптұрақ ашуды жоспарлап отыр, - дейді Маңғыстау облысы Полиция департаменті бастығының бірінші орынбасары Амангелді Халмұрадов.
Еске сала кетсек, 3 қараша күні облыс әкімі Нұрлан Ноғаев Маңғыстау ауданына жұмыс сапары барысында бірнеше жылдан бері Шетпе ауылының тұрғындары мен қиыршық тас өндіретін кәсіпкерлер арасында дауға айналған карьерге барған болатын. Ауыл тұрғындары шамадан тыс жүк тиеген ауыр жүк көліктерінің кесірінен 2017 жылы салынған тас жолдың бұзылып жатқанын айтып шағымданды. Нәтижесінде аймақ басшысы карьердің жанынан өтетін ауыр жүк көліктерінің қозғалысын бақылау пунктін орнатуды тапсырды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
