Маңғыстау ауданындағы Ұштаған ауылының 10-сынып оқушысы Мерей Мейрамбаева 300-ден астам сурет салған. Бір ерекшелігі, ол айрықша өнерді өз бетімен үйренген. Жас өрен бүгінде қылқаламымен жансыз бейнені тілсіз сөйлеткендей, айнытпай бейнелейді.
Мерей сурет өнеріне 5 жасынан бастап қызыға бастаған. Ол ең алғаш қыс мезгілін бейнелеген. Содан бастап табиғаттың төрт мезгілін салғанды ұнатады. Көбіне акварель, гуаш, түрлі түсті қарандаштарды қолданады.
Мерейдің суретін көргендер тақырып таңдаудағы талғамы мен әр картинасындағы түстердің үйлесімділігін бірден байқайды. Өнерпаздың айтуынша, сурет салу оқу үлгеріміне кедергі келтірмейді. Ұстаздары да оның тума талант екенін, мектеп қабырғасында қолтаңбасы бар суретші екенін айтады.
Мерей 2 сағаттың ішінде кез-келген суретті айнытпай қайталап сала алады.
Жас суретшінің жеткен жетістігі де аз емес. Аудандық, қалалық сурет салу сайыстарынан жүлделі орын алып жүр. Болашаққа деген жоспары көп. Кәсіби суретшілерден тәлім алып, шеберлігін шыңдауды алдына мақсат етіп қойған. Ал арманы - сурет әлемінде өз қолтаңбасын қалдыру.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
