Маңғыстау ауданында «Жұмыспен қамту жол картасы» аясында 17 жоба іске қосылады. Бұл туралы өңірлік қоғамдық коммуникациялар орталығында өткен брифингте Маңғыстау аудан әкімінің орынбасары Талғат Қылаңов мәлімдеді, - деп хабарлайды mangystaumedia.kz сайты.
Аталған инфрақұрылымдық жобаларды іске асырудың жедел мониторингі бекітіліп, тендер жарияланған болатын. Соның нәтижесінде аудан әкімдігі 15 мердігер мекемемен келісімшартқа отырды. 17 жобаның он бесі - жергілікті, қалған екеуі республикалық бюджеттен қаржыланады. Әр жоба аясында құрылатын жұмыс орынның 50 пайызына дейін жұмыссыз тұрғындарға жолдама беру керектігі келісімшартта көрсетілген.
«Осыған орай біздің ауданға қарасты ауыл әкімдіктерінен тұрақты табыс көзі жоқ азаматтардың тізімі жасалып, бригада ұйымдастыру жұмыстары жүргізілді. Қазіргі уақытта 17 жобаның 15-ін жүзеге асыру қолға алынды. Жоспар бойынша 599 жұмыс орны құрылады. Оның ішінде 299 орынға жұмыспен қамту орталығы арқылы жұмыссыз азаматтар алынып жатыр. Бүгінде 265 адам жолдама алып, жалпы саны 586 тұрғын жұмысқа қабылданды», - деді Т.Қылаңов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
