Ақтауда әкелі-балалы кәсіпкерлер серуен қайықтарын жасауды қолға алған

© lada.kz

Ақтауда серуен қайықтарын жасау өндірісі жолға қойылған, деп хабарлайды mangystaumedia.kz сайты Хабар 24-ке сілтеме жасап.

Туристік салаға қажетті кәсіпті әкелі-балалы кәсіпкерлер игеріп жатыр.

Қазір олардың меншігінде 3 катамаран бар. Жақында құрастырылған тағы бір қайық Атырау өңіріне жіберіледі. Шетелдік үлгілерден кем түспейтін су көліктерімен саяхатшылар айдында серуендеп жүр. Олармен бірге арна тілшісі Талғат Исламұлы ашық теңізге шығып қайтты.

Талғат Исламұлы, тілші:

- Кәсіпкер Андрей Чуваков басқаратын ұжым соңғы 10 жылда шағын су көліктерін жасауға төселіп алған. Бастапқыда ағаштан көлемі әртүрлі моторлы қайықтарды құрастырып көріпті. Тәжірибе молайған соң шыныпластиктен катамаран жасай бастаған. Өңірде үш жыл бұрын жүзеге асқан аймақтық бизнес жобасы аясында өндіріске қажет құрал-жабдықтар мен шикізатты сатып алуға несие рәсімдеген екен.

Андрей Чуваков, кәсіпкер:

- 2017 жылы Маңғыстау өңірінде туризмді дамытудың аймақтық жол картасы жасалды. Оған біз екі палубалы серуен қайықтарын құрастырамыз деген жоспармен қатыстық. Ойымыз мақұлданып, «Даму» қоры арқылы қомақты қаржы алдық. Алғашқы катамаран сол жылы 9 айда жасалды. Қаңқасын шыныпластиктен құрастыру темір не ағашқа қарағанда сәл қиындау. Қалған бөлшектерін Ресей, Еуропа мен Қытайдан сатып аламыз.

Кейінгі катамарандар 6-7 айда құрастырылған. Салқын мезгілде қайық жасауға жұмылатын қыз-жігіттер жаз айлары әлгі қайықтардың экипажына айналады. Өрімдей жастар тізгіндеген су көлігінің бірімен туристермен бірге біз де ашық теңізге шығып, оның беріктігіне көз жеткіздік.

Талғат Исламұлы, тілші:

- Ақтаудың ең көрнекті орындарының бірі – «Жартасты соқпақ» сүрлеуімен жаяу 1,5 шақырымдай жер жүресіз. Ал, ашық су бетіне қайықпен шығатын болсаңыз, бұл қашықтық бар-жоғы 1 мильді құрайды. Маңғыстаулық шеберлер құрастырған мынадай екі палубалы су көлігі бір мезетте 50 туристті алып жүре алады. жағажай бойымен серуендеу уақыты – 40 минут.

Пандемияға орай қайық бортына тек 25 адам алынады. Онда да әр орындыққа бір жолаушыдан отырады. Теңізге шығып келген сайын катамаран іші жуылып, микроб жойғыш сұйықтықпен зарарсыздандырылады.

Талғат Исламұлы, тілші:

- Катамаран штурвалын ұстау – кез келген туристің арманы. Біз келе жатқан су көлігін басқару оңай. Рөлді сәл бұрсам, мінекей, бағыт өзгерді. Айтпақшы, бұл қайықтың капитаны Даша есімді қыз бала.

Бағымызға орай серуен кезінде теңіз бетінде жүрген итбалықты көрдік. Теңіз хайуаны адамдардан жасқанбай, катамаранға жақын жүзді. Жалпы қайықтың жылдамдығы сағатына 10 шақырымнан аспайды. Оның техникалық сипаттамасын Дарья түсінікті тілмен айтып берді. Жасы жиырмадан енді асқан қыз Астраханьда су көлігін басқару курсын оқыған. Енді ақтаулық шеберлермен бірге оларды құрастыруды үйреніп жүр.

Дарья Старостина, катамаран капитаны:

- Капитан қызметінің ең қиын тұсы – жолаушылардың қауіпсіздігіне жауап беру. Серуен кезінде туристер қайықтың артқы бөлігіне жиналып, фотоға түскенді ұнатады. Ол жерге салмақ ұлғаюымен қозғалтқышқа су кету қаупі бар. Осы ретте матростармен бірге ереженің бұзылмауын бақылаймын. Әкем теңізші, мен оның ізін жалғастырып келемін. Ендігі мұратым – кеме құрастыру мамандығын меңгеру.

Отандық үлгідегі қайықтармен Каспийде мамыр-қыркүйек айлары серуендеуге болады. Жоба авторлары енді катамарандардың ашық жерін қаптап, ішіне жылытқыш жүйе қондырмақ ойда. Сәйкесінше, оларды қыс мезгілінде желсіз ашық күндерде қолдануға болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.