Маңғыстаулық мұнайшы жастарды спортқа баулып жүр

Шетпелік әкелі-балалы Алтыбаевтар гір тасын көтерумен тұрақты түрде айналысып келеді. Тіпті, екеуі де Қазақстан Республикасының чемпионы. Спортты серік еткен отбасы ауылдастарын ауыр атлетикаға жататын спорт түріне баулуда. Бұл туралы Маңғыстау ауданы әкімдігінің баспасөз қызметі хабарлады.

15 жастағы Дархан Бүркітбай 24 келі гір тасын 80 рет көтерсе, әкесі әрі бапкері Нартай Алтыбаев 24 келі гір тасын 100 рет көтереді. Нартай Алтыбаев бұл спортпен 14 жылдан бері айналысады. Сондықтан гір тасын көтерудің қыр-сырын бес саусағындай жақсы біледі. Баласын да кішкентайынан қасына ерте жүріп, дайындап, жарысқа қосты. Ел чемпионы титулын иемденген Дархан қазір 2022 жылы Азияда өтетін әлем чемпионатына дайындалып жатыр.

- Гір тасын көтеру жанымызға жақын, қанымызға сіңген спорт түрі. Кезінде қазақ даласынан шыққан спортшылар түрлі деңгейде топ жарды. Талай рекордты да жаңартты. Қазақтың атын шығаратын спортшы жастарды әлемдік деңгейде танытқым келеді. Осы бағыттағы жұмыстар жалғасып жатыр - , деді Нартай Алтыбаев.

Бапкер Нартай Алтыбаев ауыл жастарына білгенін тегін үйретеді. Тіпті 20-ға жуық шәкіртінің тең жартысы гір көтеруден чемпион. Ол тек ер балалардан ғана емес, қыздардан да чемпион шығарған бапкер. Көпбалалы әке өзінің қыздарын да осы спортқа баулуды жоспарлап отыр. Мамандығы мұнайшы болғанымен спортқа деген ықыласы ерекше. Алдағы уақытта гір көтеру спортын одан әрі дамыту үшін ауылдан спорт зал ашқысы келеді. Ол үшін жастар тәлімгері қазірден бастап жұмыстанып жатыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.