Спорт - өмір, жалынды жастық, мықты денсаулық. Спорт – мәнді де мағыналы салауатты ғұмыр өлшемі. Жастайынан спортты серік еткен жандар оны бар ғұмырына біте қайнастырып әкетеді. Тамыз айының үшінші жексенбісі спорт күні қарсаңында аудан көлемінде биік белестерді бағындырып, өлкеміздің атын көпке танытып жүрген спортшыларымызды саралаған едік. Біз сөз еткелі отырған Салауат Тоқсанов — жастайынан спортты жанына серік етіп, дзюдо, самбо күресімен айналысып келе жатқан азамат. 2002 жылы Жыңғылды ауылында дүниеге келген. Сондағы білім шаңырағынан нәр алып, қанаттанған. Мектеп қабырғасында жүрген кезінен-ақ спортқа бейім болған Салауат бүгінде байрақты бәсекелерді бағындырып келеді.
Cалауат өз тұсында аудандық, облыстық, республикалық жарыстарға қатысып, жүлделі орындарды еншілеген жайы бар, жеткен жетістіктеріне көз жүгіртсек, шетіне жетпейсің. Қажы Нукенов Темиршотты еске алуға арналған дзюдо күресінен жасөспірімдер арасында өткен республикалық турнирде 1-орын, самбо күресінен 2002-2004 жылы туылған жасөспірім ұлдар арасында ІІІ халықаралық «Ақтау кубогы» турнирінде 1-орын, Нұр-Сұлтан қаласының 20 жылдығы, Маңғыстау облысының 45 жылдығы, Ақтау қаласының 55 жылдығына арналған V халықаралық «Ақтау кубогы» турнирінде 1-орын, дзюдо күресінен 2001-2003 жылы туылған жасөспірім ұл, қыздар арасында халық батырлары Иса-Досан жүлдесіне арналған ІІІ халықаралық турнирде 2-орын, Judo international tournament «ZEYTUN CUP» халықаралық турнирінде 3-орын иеленген. Бұл спортшы Салауаттың жеткен жетістіктерінің бір бөлігі ғана болатын.
- Кішкентайымнан спортқа қызықтым. Ауылда спорт мектебіне барып, сондағы жаттықтырушылармен түрлі жаттығу жұмыстарымен айналыстым. Спортқа деген қарқынымды байқаған жаттықтырушы ағайларым мені түрлі жарыстарға қатыстырып, одан жүлдемен орала бастадым. Бұл жаттықтырушыларымның еңбектерінің ақталғаны дер едім. Ендігі мақсатым — Алла қаласа, бұдан да биік белестерді бағындырып, ауылымның атын көпке таныту. Осы жолда барымды салатын боламын!, - дейді спортшы Салауат.
Ұранды елдің ұрпағы қайсар болатыны ежелден белгілі. Бірбеткей мінезі, қайраттылығымен талай тартысты додаларда қарсыласының сағын сындырған, белдескеннің белін, тірескеннің тізесін бүктірген Салауат сынды спортшымызды көпке үлгі етуге болады.
Туған өлкесін жанарында ұстап, жадынан шығармайтын жас спортшының талай асулардан асарына сенім мол.
Дина УТЕПБЕРГЕНОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
