Сахна киелі орын

Жастық шақ – адамзат өмірінде ерекше мәнге ие, шаттық пен қуанышқа, күш-қайратқа толы уақыт. Сондай-ақ осы сәт білім мен өнерді бойға дарытып, даналықты меңгеруге таптырмайтын кез. «Жастық шағың – жарқын жаздың бейнесі, құтты жаздың ала алсаң, жоқ бермесі» деп Сәбит Мұқанов айтқандай, жас жан әркез құлпырып, қиялға беріліп жүреді. Оның ойында сан түрлі арман мен алдында нық жоспар тұрады және соның барлығына қол жеткізетіндей жігері тағы бар.

Ауданымыздың мәдениет пен өнер саласында белді еңбек етіп жүрген Ақылбек Қабасов 1991 жылы 17 қаңтарда Шетпе кентінде дүниеге келген. 2008 жылы Б.Жұмалиев атындағы орта мектепті аяқтады. Өнерге бейім, білім мен өнерді қатар алып жүрген Ақылбек аудандық балалар өнер мектебін 2008 жылы бітірді. Мектеп қабырғасында жүріп І.Шыртанов атындағы, аудандық, облыстық конкурстарға қатысып, жүлделі орындарды алып жүрді. 2008 жылы М.Өтемісов атындағы Батыс Қазақстан мемлекеттік университетінің мәдениет және өнер факультетінде дәстүрлі музыка өнері мамандығы бойынша білім алды.

Жоғары оқу орнында жүріп, университет атынан халықаралық «На Николаевский» конкурсынан екінші дәрежелі лауреат атағын иеленген. Ақылбек алғаш еңбек жолын Орал қаласында «Жастар» мәдениет үйіндегі орыс ұлт аспаптар оркестрінде бастады. 2012 жылы оқуын аяқтап, туған өлкеге келіп, аудандық Балалар өнер мектебінде ұстаздық қызмет етіп, прима, шертер, домбыра, оркестр пәндерінен сабақ берді. 2017 жылы аудандық мәдениет үйіне ауысып, қазіргі таңда сол мәдениет ошағында абыройлы қызмет етуде. Аудан көлемінде тойланатын түрлі мерекелік концерттерде Ақылбек бой көрсетпей қалған емес. Онсыз концерт өтпейді десек те болатындай…

«Жігітке жеті өнер де аз» деген мақал нақ осы Ақылбек үшін айтылғандай. Сахнаға әр сәт шыққан сайын түрлі композициялардан шашу шашқанда халық мәз-мейрам болып, көтеріңкі көңіл-күй сыйлап, халықтың ыстық ықыласына бөленетінін көзіміз көріп те жүр. Бірде прима да ойнаса, енді бір шыққанда саксафонын қолына алып, Шәмші әндерінің поппуриін тыңдаған халықтың құлақ құрышы қанып, қошеметпен қол соғып, шығарып салады. Өнер иесі үшін халықтың ыстық ықыласынан асқан баға бар ма десеңізші?! Бұдан бөлек қазақтың қара домбырасында, гитарада ойнайтын оның барлық аспапты жетік меңгергенін, киелі сахна үшін жаратылған жан екенін бірден ұғынасың.

«Сахна – киелі орын. Ол мықты-мықты өнер иелерімен киелі, көрсетер үлгі өнегесімен, халыққа, көрерменіне айтары мен берері бар болғандықтан да киелі. Өнер мектебінен көрерменнің рухани азық алатын құтты мекені. Осындай киелі орынның мен де бір мүшесі болып, халыққа өз өнерімді көрсетіп, ой салып, олардың рухани баюына атсалысып жатқаныма қуанамын», - дейді Ақылбек.

Киелі сахнаға төселіп, ауданның өнер саласында елеулі үлес қосып жүрген Ақылбектің жеткен жетістіктері де аз емес. 2013 жылы Алматы қаласында өткен "Күншуақ" республикалық конкурсынан "Гран при" жүлдесін иеленсе, әр жыл сайын ауданның мәдениет саласындағы еңбегі үшін аудан әкімінің, облыстық ғылыми-әдістемелік және мәдени қызмет көрсету орталығының, облыстық мәдениет басқармасы басшысының алғыс хаттарымен марапатталып келеді. Өнер әлемінде қанатын кең жая самғаған Ақылбектің халыққа берері әлі де көп.

Дина УТЕПБЕРГЕНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.