Мұнайлыдағы "Маңғыстау жұлдыздары" фестивалі

Облыстық мәдениет басқармасының ұйымдастыруымен 12 сәуірде бастау алған облыстық "Қазақстан - жалғыз ұлы қазақтың" атты X «Маңғыстау жұлдыздары» өнер фестивалі Мұнайлы ауданында да жалғасын тапты. Оған түрлі аталым бойынша ауданнан 190 адам қатысты. Шараның шымылдығы "Халық биі" номинациясы бойынша сынға түскен "Інжу маржан" би ансамбілінің "Көктем әлемі" биімен түрілді. Өнерпаздардың өнерін тамашалауға аудан әкімі Нұрлан Тәжібаев пен  облыстық мәдениет басқармасы басшысының орынбасары Гүлнар Базаралиева, басқа да биліктегі азаматтар, тұрғындар мен өзге аудан, қалалардан көрермендер келді. - Бұған дейін дайындық ретінде "Мұнайлы жұлдыздары" фестивалін өткізгенбіз. Онда бақ сынаған 480 өнерпаздың 190-ы X облыстық өнер додасына жолдама алды. Бұл сайыста басты назар жаңа есімдерді шығару бағытына беріліп отыр. Яғни танылмаған таланттардың, жас ақындардың өлеңдері мен сазгерлердің, саз өңдеушілердің әндерін халыққа тарту етудеміз. Жуырда "Жаңа есім" жобасын ұйымдастырғанбыз. Бүгінгі ұсынылып жатқан көріністердің тартымды болуына оның да септігі тиді. Жеңімпаздар 19 мамырда Ақтау қаласында болатын Гала-концертте мәлім болады,-дейді Қызылтөбе ауылы мәдениет үйінің директоры Маргарита Омарова. Фестивальге келушілер Экспо-2017 көрмесін сипаттайтын түрлі қолөнер бұйымдары, қылқалам туындылары мен басқа да көрнекіліктерді көруге де мүмкіндік алды. Ішінде Қызылтөбе лицейі оқушыларының аймақ табиғатына қолайластырып жасалған жобасы бар. 8-сынып оқушысы Гүлжазира Қалиева бір жыл бойына дайындаған жер асты ыстық суынан, 6-сынып оқушысы Олжас Сәрсенғали теңіз толқынынан энергия алу жобасын алып келіпті. Гүлжазира бұл жұмысымен аудандық ғылыми жобалар сайысында I орын, облыстық кезеңінде II орын алыпты. Олжас болса, ауданнан, облыстан I орынға шығып, республикадан III орынға тұрақтапты.

Шахида Жұман