«Маңғыстау теміржолы» үздік атанды

2008 жылы «Қазақстан темір жолы» атымен құрылған «Нұр Отан» партиясы Мұнайлы аудандық филиалының «Маңғыстау теміржолы» бастауыш партия ұйымына мүше теміржолшылар саны сол кезде 78 болған болса, бүгінде 214-ке жетті. Осылайша жылдан-жылға тек сандық жағынан толығып қана қоймай, сапалық құрамға да баса мән беретін ұйым қазір 10 партиялық топпен бірқатар ілкімді істерге ұйытқы болуда.

БПҰ «Нұр Отан» партиясының «Үздік бастауыш партия ұйымы – 2018» байқауына қатысып, аудандық деңгейден бірінші орын иеленген еді. Жуырда аймақтық аламанда бақ сынады. Сынақ қорытындысы бойынша ұйым – тағы да алда.

– Облыстық іріктеуден де нәтиже төмен болмасына үміттенген едік. БПҰ-на мүшелердің сан жағынан үш санат бойынша үш ұйым үздік табылып, республикалық турға жолдама алды. Біз – екінші санат, яғни бір жүзден бес жүзге дейінгі партия мүшелері бар ұйым қатарында қатыстық. Бұл байқауда өткен жылы ауданнан екінші, 2016 жылы облыстан екінші орындарды алған болатынбыз. Биыл онан да жоғары сатыны бағындыруға жұмыстандық. Партиялық жарналар өз уақытымен жиналады. Жоспарды 8 ай көлемінде 165 пайыз, 9 айда 145 пайызға орындадық. Алда тағы талай межелерді белгілеп қойдық. Атап өтсек, партияның жасалып жатқан жаңа тұғырнамасын өз ұйымымызға енгізіп, сонымен жұмыс жүргізу. «Маңғыстау теміржолына» мүше теміржолшыларды жыл соңына дейін 250-ге жеткізу. Бұл жерде мақсат – тек санды арттыру емес, сапаны да көтеру. Алға қойылған мүдделерді олармен бірлесе отырып, жүзеге асыру. Сөзімізге мысал, ұйымға біріккен қазіргі теміржолшылардың қатары. Олардың 21 пайызы – 29 жасқа дейінгілер. Үздік жастар. Үлкен жастағылардан теміржол ардагерлері, Құрметті теміржолшылар, салаға көп жылдар тер төккен майталман мамандар. Жіктей берсек, көбі өз ортасына сыйлы, түрлі жетістікке жеткен қызметкерлер, – дейді «Маңғыстау теміржолы бастауыш партия ұйымының төрағасы, Маңғыстау жол бөлімшесінде жол қауіпсіздігі жөніндегі бас ревизор Болат Дүйсәлиев.

Оның өзінің де салада қол жеткізген талай табыстары бар екен. Ұйымды 2016 жылдың желтоқсан айынан бастап басқаратын ол сол уақыттан бергі БПҰ мұрындық болған ауқымды жобалар жайында да сөз етті. Соның біразы, яғни биылғы жылғы атқарылғандарына тоқталсақ, қаңтардың басында «Партияның жеті жобасы» бағдарламасы аясында топ жетекшілері және партия мүшелерімен бірлесе жасақталған жылдық жоспарға сәйкес жүзеге асқан түрлі іс-шараларды айтуға болады. Одан теміржолшыларға тікелей қатыстылары – бірнеше рет өткізілген қоғамдық қабылдау және онда қаралған келелі мәселелер. Қабылдауға келгендер жеке сұрақтармен қатар жалпыға ортақ жайттарды да көтерген. Мәселен, №10 бекеттегі теміржолшылардың балаларының басқа жерге қатынап, оқу жайы. №10 бекетте мектептің жоқтығына байланысты (шамамен 40 бала) Сай Өтес стансасындағы мектеп-интернатқа (№309-310 «Маңғыстау-Атырау-Маңғыстау» және №313-314 «Маңғыстау-Ақтөбе-Маңғыстау» пойыздары арқылы) қатынап оқитынын, аталмыш пойыздар №10 бекетке сағат түнгі 02:56 және 05:30-да аялдайтынын айтып, бекеттен таңертеңгі 09:18-де өтетін №377 – 378 «Маңғыстау-Алматы-Маңғыстау» пойызын аталмыш бекетке 2 минутқа аялдату жөнінде кестеге енгізуді сұраған. Бұл жөнінде қажет жерге тиісті хат жолданыпты. Сонымен қатар мерекелер қарсаңында түрлі шаралар, қайырымдылық амалдары ұйымдастырылған. Партияның «Ардагерлерді ардақтайық» жобасы аясында Маңғыстау локомотив пайдалану депосында көп жыл еңбек еткен партияның белді мүшесі, машинист Наурызбай Салтановты құрмет-қошеметпен зейнеткерлікке шығарып салу рәсімі өткізілген. №15 бекет тұрғыны, өмір бойы совхозда малшылықпен айналысып, өңір ауыл шаруашылығына үлесі қосылған Темірхан ақсақалды Мұнайлы ауданының әкімімен бірге құттықтай барып, ауданның мерейтойлық медалімен марапаттаған. Қарттар мерекесінде қарияларды қуанту шаралары ұйымдастырылған. Тазалық айлығы күндері сенбіліктерге атсалысқан. Түрлі спорттық сайыстар өткізілген.

Шахида ЖҰМАН

Көрнекі сурет сайттың архивінен

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.