Сенат депутаты теміржолшылармен кездесті

Қазақстан Республикасы Парламенті Сенатының депутаты Бақтыбай Шелпеков пен облыстық мәслихатының депутаты Серікбай Тұрымов, Мұнайлы ауданының әкімі Нұрлан Тәжібаев теміржолшылармен кездесіп, Мемлекет басшысының «Қазақстандықтардың әл-ауқатының өсуі: табыс пен тұрмыс сапасын жақсарту» атты биылғы Жолдауын түсіндірді.

Жиын Маңғыстау жүк тасымалы бөлім­шесінде бөлімше директоры Нәжімеден Ғұбашовтың және сала қызметкерлерінің, темір­жолдан шыққан облыстық, аудандық деңгейдегі депутаттардың, аудан активі мен ақсақалдар кеңесі өкілдерінің қатысуымен өтті. Сенат депу­таты Жолдауда Елбасы қамтыған мәселелерге тоқтала келе, өз сөзінде «Қазір бала мектепті бітіріп алады да «Мен қай оқуға барамын?» деп ата­-анасынан сұрайды. Негізінде ол мектептен шықпай жатып, қайда баратынын шешіп қоюы қажет. Колледжде, институтта оқи ма, әлде басқа жерге жұмысқа орналаса ма, алдын ала нақты ойы болуы тиіс. Сондай деңгейге жеткі­зуіміз керек.

Ал енді денсаулық сақтау саласын  алсақ. Медицина әлем бойынша қарқынды даму­да. Қазақстанда да осы салаға қыруар қаржы бөлінді, тағы да бөлінбек. Қаншама медицина­лық орталықтар салынды. Еліміз қазір бұл бағытта ғимарат, техникалық жабдықталуы жағынан алда. Тек мәселе – адамда. Дәрігер­лердің деңгейінде. Жолдауда Президент жа­ман ауруға байланысты орталық ашу туралы да айтты. Медицинамен бірге енді көп нәрсе адамның өзіне де тәуелді. Спортпен айналысу, өз денсаулығын күту. Жолдауда бұған да көп көңіл бөлінді. Сондай­-ақ «Нұрлы жол» бағдар­ламасымен Қазақстанның орталығынан оңтүс­тікке, солтүстікке, батыс, шығысқа жолдар са­лынуы бәрімізге белгілі. Көпшілік елдің сыртқы қарызы туралы айтады. Мұны неге керек, кейбір елдерде тіпті қарыз жоқ дейді. Бірақ сол қарызы жоқ елдің деңгейі қарызы бар елден жақсы болса, бір жөн. Көбінде қарызы да жоқ, деңгейі де төмен болып тұр ғой. Әңгіме сонда. Ал енді бізде сол қарыз қайда кетеді десек, тоқсан пайызы жол құрылысына жұмсалады. Оның бір қызығын Маңғыстау да көріп отыр»,­ - деп атап өтті. Сондай-­ақ «Өзен-­Түрікменстан» жолаушы­лар пойызы мәселесінің Сенат отырысында көтерілгенін тілге тиек етті.

Одан соң аудан әкімі Жолдауда қамтылған мәселелердің Мұнайлыдағы іске асу барысы­нан ақпар берді. Қатысушылар да өз сұрақтарын жолдап, ұсыныстарын ортаға салды. Мұнайлы аудандық ақсақалдар кеңесінің мүшесі жаңа теміржолдардың салынып жатқанына ризашы­лығын білдіріп, көкейіндегісін ортаға салды.

─ Бұрын Алматыға үш тәулікте әупірімдеп жетуші едік. Тікелей жол салынып, ол уақыт қысқарды. Вагондарды ауыстырғаны да құп­тарлық жағдай. Дей тұрғанмен пендеміз ғой. Жақсы болған сайын одан да артығын қалай­мыз. Енді жүрдек пойыз шығарылса деген же­рімізге қазіргіден де тезірек барсақ. Алматы мен араны жақындатқан жолдың салынғанына екі жылдай болып қалды. Білуімізше, бұл мерзім ішінде жол жүрдек пойыздың жүруіне жарам­ды болуы тиіс,­ - деді ардагер. Бұған Б.Шелпеков жүрдек пойыз мәселесін бұдан екі жыл бұрын қозғағанын айтып, оны жүргізу тәртібі бар еке­нін және оған өзіндік жүйе қажет деген жауап алғанын мәлімдеді. Маңғыстау жүк тасымалы бөлімшесі директоры Нәжімеден Ғұбашов «Екі жылдай жүріп, сіз айтқан сынақтан өттік. Жүк пойыздарын 40 шақырым/cағат, жолаушылар пойыздарын 60 шақырым/cағатпен жүргізетін едік. Бүгінде жүк пойыздарын 60, жолаушы­лар пойызын 80 км/cағатқа көтердік. Соның нәтижесінде жол 78 сағаттан 73­-ке түсті. Тағы да жылдамдық арттырылып, 68 сағатқа жетті. Жал­пы 2019 жылдың аяғында жылдамдық сағатына 80­-90 шақырым дейін барып, пойыздың же­тетін уақыты екі тәулікке шақталады. 53 сағат болып  есептелінген.  Сонда  уақыт бұрыңғы 78 сағаттан 53-­ке дейін төмендейді. Қазірдің өзінде 63 сағатты құрайды. Оны тағы да 10 сағатқа қысқарту алдағы уақыттың жоспа­рында. Бірақ мұның бір кедергісі халықтың көптеп мал өсіретіні, оның жолға шығып қалу мүмкіндігі. Сондықтан кейбір ауыл маңдарынан өткенде пойыздардың жүріс жылдамдығын азайтып отырмыз. Жолдың екі жағасына малға қарсы қойылатын қоршаулар бітпейінше жыл­дамдық 80 шақырым/cағаттан аспайды», - ­деп толығырақ түсінік берді. Сондай­-ақ бөлімше директоры алдағы уақтытта Маңғыстау теміржолында күтілетін жағымды жаңалықпен де бөлісті. «Осыдан жарты жыл бұрын түбектегі вагондарды жаңарту жөнінде айтылып, шешімі болады делінген еді. 2019 жылдың екінші жар­тысына қарай «Ақтөбе-­Маңғыстау», «Алматы­-Маңғыстау» бағыттарының вагондары жаңа және жайлы вагондарға ауыстырылатынын ес­тідік», - ­деді Н.Ғұбашов.

Сонымен қатар Маңғыстау вагон пайдалану депосының басшысы Сәрсенбай Есенқұлов Құрыққа, Түрікменстанға қатынайтын пойыздар алдағы уақытта бұдан да көбейсе, қазірдің өзінде теміржол өткелінде болатын көлік кептелісі одан да артатынын ойластырып, теміржолды бойлап, жаңа жол салу қажеттігін ұсынды.

Шахида ЖҰМАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.