Салауатты өмір салтын ұстанған отбасы

Жақында ғана Астана қаласында теміржолшылар отбасыларының арасында өткен республикалық «Папа, мама и я – спортивная семья» спорттық сайысына қатысып, командалық есепте жүлделі үшінші орынды иеленген Жұбатқановтар жанұясына жарыстан алған әсері оң нәтиже берген екен. Бұрын да салауатты өмір салтын сақтайтын олар енді спортқа онан да қатты қызығушылық танытуда. Алдарына биік-биік мақсаттарды айқындап қойған.

Бұл – бар-жоғы он жылдың ішінде қазақстандықтардың санын төрт қаракөзге көбейтіп отырған маңғыстаулық теміржолшының отбасымен спорттан жеткен алғашқы жетістігі. Отағасы Айтбай Жұбатқанов - Маңғыстау станциясында вагондар қозғалысының жылдамдығын реттеуші, ал жұбайы Ақтолқын Қосымбаева - «Қазақтелеком» акционерлік қоғамының Маңғыстау филиалында ұйымдастыру және бақылау бөлімінің басшысы. Бұған дейін де «Тәні саудың – жаны сау» дегенді басшылыққа алатын олардың енді спорт жанұялық жақынына айналады десек, қате болмас. Отанасының айтуынша, төрт баланы дүниеге әкелсе де сайыста көрсеткен жылдамдығына өзге қатысушылар да тәнті болып, танданысын жасырмағандар да болыпты. Өзі мектеп, жоғары оқу орнында волейбол, теннис үйірмелеріне барған екен. Кейін келін болып, тұрмыстың күйбең тірлігімен мұнысын тастаса да екі баласын спортқа баулыпты. Жарыста өздерімен бірге ойын көрсеткен тұңғышы Нұртөре мен 2010 жылы туған ұлы Қазбекті каратэ мектебіне беріпті.

− Қазбегіміз келесі жылы мен де қатысамын деп ауылға келгеннен ерекше бір дайындыққа кірісті. Астанаға төрт баламды да алып барған едім. Әрі еліміздің астанасын көрдік, әрі өте жақсы әсер алдық. Әлі жасына толмаған кішкентайымызға дейін сол жерде болып, барлығы да жарысты тамашалады. Бұл барлығымыз бірге болған бірінші спорттық шара болғандықтан ба, біз үшін орны бөлек. Үйде өзімізден бастап салауатты өмірге қатты мән береміз, соны ұрпағымызға да ұқтырудамыз. Оның ішінде дұрыс тамақтану, зиян әдеттерден аулақ болу дегендей. Күйеуімнің жұмысы да спортқа біртабан жақындау деуге болады. Арнайы айналыспаса да вагондардың арасында жүгіріп жүрудің, өз басының және жұмыстағы қауіпсізді сақтаудың өзі жылдамдық пен ұқыптылықты талап етеді. Өзім қазір декреттік демалыстамын. Төрт баланың күнделікті қамын жасаумен менің де жүгірісім аз емес. Бірақ алдымызда біраз мақсаттарымыз бар. Осы бәйге бізге келешекке үлкен стимул болды. Бәрі – уақыттың еншісінде, - дейді Ақтолқын Қосымбаева.

Еске сала кетейік, аталған жарыс Елордада қарашаның 1-2 күндері өткен еді. Онда Жұбатқановтардан бөлек аймақтардағы теміржолшылардан 27 жанұя 7 команда болып сынға түскен. Жерлестеріміз Алматы, Қызылорда, Ақтөбеліктермен бірге «Болашақ» тобында ойын көрсетіп, үшінші орынды жеңді. Ауылға медаль, диплом, бағалы сыйлықтармен қуанышты оралды.

Шахида ЖҰМАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.