Биыл да көлік қызметкерлері күніне орай мерейі артқан маңғыстаулық теміржолшылардың қатары көп болды. Марапатталушылардың көш басында «Құрметті теміржолшы» белгісін алған Маңғыстау белгі беру және байланыс дистанциясының аға электр механигі Аққали Ходжаұлы мен Маңғыстау станциясының дөңес кезекшісі Рая Халикова болды. Марапаттар мейрам құрметіне облыстық филармонияда ұйымдастырылған салтанатты шарада табысталды.
Кешке сала ардагерлері, орта буын, жас теміржолшылар мен құрметті қонақтар қатысты. Жиынды жүк тасымалы бөлімшесінің басшысы Нәжимеден Ғұбашов ашып, әріптестеріне игі тілегін білдірді.
«Өз алдына жеке филиал болып ашылғалы өңірімізде ел экономикасының қарыштап, дамуына сүбелі үлес қосатын стратегиялық маңызды, ірі көліктік жобалардың ашылуының куәсі болдық. Атап айтсақ, 2011 жылы 146 шақырымды құрайтын «Өзен-Болашақ-Түрікменстан» темір жол желісі пайдалануға берілді. 2014 жылы «Бейнеу-Шалқар» учаскесіндегі «Бейнеу-Тассай» темір жолы іске қосылды. Ақтау халықаралық теңіз сауда порты арқылы тасымалданатын жүктің көлемін 19 млн. тоннаға дейін арттыру мақсатында салынған астық терминалдарының құрылысы, құрғақ жүктерді сақтайтын және порттың инфрақұрылымдық объектілерінің Солтүстік терминал құрылысы пайдалануға берілді. 2016 жылы «Боржақты-Ерсай-Құрық» жаңа теміржол желісі іске қосылды. Осылайша өткенімізге көз жүгіртсек, өскеніміз бен өнгенімізді мақтана аламыз», – деді ол өз сөзінде.
Одан соң құттықтау кезегі облыстық жолаушылар көлігі және автомобиль жолдары басқармасының бастығы Әліби Көшербаевқа, ардагер теміржолшы Қожахмет Уәзірге, саланың жас маманы Нұрзада Темірқұлға берілді. Марапат иелерінің аты аталып, еңбегі еленді. Оның ішінде ҚР Инвестициялар және даму министрлігінің Құрмет грамотасы Сара Амановаға, Ағлепес Созақбаевқа, Әбілсейіт Нәбихановқа, Алғыс хаты Демей Айдаровқа берілсе, «Самұрық-Қазына» ұлттық әл-ауқат қоры АҚ-ы төрағасының Құрмет грамотасы Ерлан Нұрмолдаға тапсырылды. ҰК президентінің Құрмет грамотасын Галина Абдикадирова, Оспан Есбосынов, Амантай Гульджиков, Нұрлан Жалғасбаев, Үміт Мұқашева, Абатбай Шамшиев, Ережеп Нұртай, Камалатдин Қаржауов, Алғысын Саламат Хасайнов, Наурызбек Исатаев, Дүйсен Иманкалиев, Аманғали Жүсіпов, Сейлхан Маргов алды. Сондай-ақ Оразбай Жұмағұлов, Байғали Сатыпалды, Жеңіс Қалдықараев, Жеңісбай Жайлауов «Кәсібі бойынша үздік», Сейтжан Маргов, Ерназар Ізтұрғанов, Мырзабай Битанов, Құралай Чукенова, Жаңылай Айтимова, Алтынай Қашқынбаева «Үздік маман» атанды. Талғат Маханбетов, Бөкенбай Арыстанов, Жеңісбек Исанов, Назархан Сариев, Ыбырай Сатыбалдиев, Кенжебек Орынбаев, Берік Дүйсенбаев «Қозғалыс қауіпсіздігі үшін» белгісін төсіне тақты. Тағы біраз теміржолшы мен жас теміржолшылардан құралған спорттық командалар, «Маңғыстау.кз» жайдарман тобы өзге де сый-құрметке ие болды. Сонымен қатар Маңғыстау станциясының жол монтеры Сейтжан Жұбатыров пен Рахметолла Жақыпты әріптестері құрметті демалысқа шығарып салды.
Ш. ЖҰМАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
