Абай бол, құлыным!

Міне, тағы бір оқу жылы аяқталып, мектеп оқушылары үлкен өмірге қадам басқалы отыр. Енді олар білім іздеп  өзге облыстарға жол тартады. Тіптен, кейбір жастарымыз шетел асады. Күні кеше мектеп қабырғасынан тұлеп ұшқан балаларымызды ірі қалалардың қым-қуырт тірлігі күтіп тұр. Онда ауыл баласын арбап, өз жолына тартатын теріс пиғылдылар да жолығуы мүмкін. Осындай оқиғалардың алдын алу мақсатында №11 мектепті бітіруші сыныптармен дөңгелек үстел өтті. Кездесуді «Ақтау қалалық ауған соғысы ардагерлерінің жауынгер бауырластар» қоғамдық бірлестігі облыстық жастар саясаты басқармасының «Дін мен дәстүрді үйлестіре білген халықпыз» атты әлеуметтік жобасы аясында ұйымдастырды. Оған қоғамдық бірлестік төрағасы Мәтжан Шаулиев, облыстық дін істері басқармасының маманы Нұрболат Оңғар,  ауған соғысының ардагері Болат Құрамысов қатысты. Дін істері басқармасының өкілі оқушыларға ҚР діни экстремизм мен терроризмге қарсы іс-қимыл жөніндегі 2013-2017 жылдарға арналған мемлекеттік бағдарламасымен реттелетін діни қарым-қатынастар жөнінде түсінік берді. Ол: "Санаулы күндерден кейін көпшілік оқушылар жоғары оқу орындарына түсіп, өзге өңірлерге аттанады. Ол жақта дәстүрлі дінімізді бұрмалап жүргендермен де кездесіп қалуы мүмкін. Солардың жетегіне кетпеу үшін жастарда жат діни ағымдарға деген «антивирус» болуы керек",-деп ислам және христиан діндерінің таралу аймағы мен олардың негізгі қағидалары туралы слайд көрсетіп, дін туралы біраз мағлуматпен таныстырды. Ауған соғысының ардагерлері М.Шаулиев, Б.Құрамысов та тақырып аясында білгендерімен бөлісті.