Әскерге бармасаң айыппұл арқалайсың!

Елімізде азаматтарды Қазақстан Республикасы Президентінің Жарлығы мен ҚР Үкіметінің қаулысы негізінде жылына екі рет әскерге шақырту жұмыстары жүргізіледі. Әскерге 18 жастан 27 жасқа дейінгі әскерге шақырылудан босатуға құқығы жоқ азаматтар өз борышын өтеуге міндетті. Ал әскерге бармасаң айыппұл арқалайтыныңызды білесіз бе? Жасы он сегізден асқан әрбір азамат Отан алдындағы борышын өтеуге міндетті. Аудандық қорғаныс істері жөніндегі бөлімнің 2016 жылғы есебі бойынша ауданнан 200-ден астам жас әскери қызметке жөнелтілді. Ал, биыл 300-ден астам әскерге шақырылушыларды өз азаматтық борышын өтеуге аттандыру жұмыстары жоспарланып отыр. Әскерге жөнелту жасына толған азаматтардың ішінде кейбіреулерді жағдайларына байланысты аудандық әскерге шақыру комиссиясының шешімі бойынша кейінге қалдыруға болады. Олар отбасы жағдайын ескеріп немесе жоғары оқу орнында білім алып жатқан жағдайда, денсаулығына байланысты әскерді кейінге қалдыра алады. Шақыру қағазын алған азаматтар жергілікті басқару органдарына келуге тиіс, келмеген жағдайда әкімшілік жауапкершілікке тартылады. Мерзімді әскери қызметке шақырылған азаматтар әскери қызметтен жалтарған жағдайда, КР Қылмыстық Кодексінің 387 бабы бойынша бір мың айлық есептік көрсеткішке дейінгі мөлшерде айыппұл салуға немесе бір жылға дейінгі мерзімге бас бостандығынан шектеуге, болмаса дәл сол мерзімге бас бостандығынан айыруға жазаланады. Сондықтан денсаулығыңыз жарап тұрса, айыппұл арқаламай, Отан алдындағы борышыңызды өтегеніңіз абзал.

Гүлнәр Тасболатова