Мұнайлы ауданының үздік жастары марапатталды

Сәрсенбі күні Қазақстан Республикасы Тәуелсіздігінің 26 жылдығы мен Мұнайлы ауданының 10 жылдығы аясында «Төрт сері» салтанат сарайында «Мәңгілік ел жастары» тақырыбымен жас патриоттар форумы өтті. Форум ретро бағытында болып, дәстүрлі «Жас патриот-2017» жастар сыйлығы табысталды.

Cалтанатты кеш лазерлі шоумен ашыл­ды. Онда бүгінгі кештен мазмұн беретін бірқатар мағлұматтар көрсетілді. Осы сәтте ортаға үш жүргізуші шығып, Елбасының үш тілділік саясатын қолдау мақсатында үш тіл­де ән орындады. Әсем әнмен көрермен көңілін көтерген жүргізушілер жастар сыйлығының жыл­ намасына шолу жасап өтті.

Айта кетсек үздіктерді анықтайтын бұл байқау 2010 жылдан бері жалғасын тауып келеді. Осы жылдар ішінде 16 аталым бойынша 615 жас өз құжаттарын табыстап, 76 жас жеңімпаз атан­ған. Биыл сегізінші рет ұйымдастырылып отыр­ған аталмыш шараға осы жеңімпаздардың бірқатары қонақ ретінде келіп қатысты. Кейінгі жастарға таныстыру мақсатында олардың есім­дерін атап өтті.

Бұл форумның басты мақсаты – жылды қорытындылап, сол жылдағы әр саланың үздіктерін марапаттау. Деректерге сай биыл «Жас патриот - ­2017» жастар сыйлығына 10 номи­нация бойынша 59 жас өз құжаттарын тапсырып, олардың ішінен 10 жеңімпаз анықталған. Яғни «Жас көшбасшы», «Жас мемлекеттік қызметкер», «Жас үздік дәрігер», «Жас үздік құқық қорғаушы», «Жас үздік өндірістік қызметкер», «Жас үздік коммуналдық қызметкер», «Жас үздік ұстаз», «Жас үздік спортшы», «Үздік жастар комитеті», «Жас үздік ауыл маманы» номинациялары бойынша.

Аудан әкімі Нұрлан Тәжібаев пен Маңғыстау облысының жастар саясаты жөніндегі басқарма басшы­сы Аманғали Нұрдәулетов форумға қатысушылар мен жеңімпаздарға құттықтау сөз сөйлеп, жоғарыда аталған номинацияларды табыстады.

Жеке­-жеке тоқталар болсақ, «Жас патриот - 2017» жастар сыйлығының «Жас көшбас­шы» номинациясымен Маңғыстау ауылдық «Миғраж» мешітінің жа­нынан құрылған «Үммет жастары» еріктілер тобының жетекшісі Мұрат Абулха­нов Парахатұлы марапатталды. Ол 2015 жылдан бері «Үммет жастары» еріктілер тобын басқарып келеді. 100-­ге жуық жастардың басын қосып, әр сенбі сайын сен­білік қайырымдылығын жүргізіп келеді. Сонымен қатар әр мереке сайын қайырымдылық акцияла­рын өткізуде.

«Жас мемлекеттік қызмет» номинациясымен мемлекеттік қызметте 7 жылдық еңбек өтілі бар Мұнайлы ауданы әкімі аппаратының жалпы бөлімінің басшысы Мақсат Созақбаев Қуатжанұлы марапатталды. Ал «Жас үздік дәрігер» номинациясы Мұнайлы орталық аудандық ауруханасының кар­диолог дәрігері Гүлназ Хожакулыева Низамқызына табысталды.

«Жас үздік құқық қорғаушы» номина­циясымен Мұнайлы аудандық ішкі істер бөлімі, жергілікті полиция қызметі жол­ потрульдік полиция ротасының взвод командирі, полиция капитаны Нұрбол Тұрсынбаев Ералыұлы марапатталды. Құқық-қорғау саласында 10 жыл еңбек етіп, бірнеше мәрте ауыр қылмыстың ашылуына мұрындық болып, алғысқа бөленген жан.

«Жас үздік өндірістік қызметкер» но­минациясы «Экзотикалық құс әлемі» жауапкершілігі шектеулі серіктестігі­нің директоры Есен Боранбай Боранбайұлына тапсырылды. Ол – 2016 жылдан бері Батыр ауылдық округінде «Экзотикалық құстар әлемі» ЖШС-­нің басшы­сы. 5 адамды тұрақты жұмыспен, маусымдық жұмыс уақытында 18­20 адамды жұмыспен қамтып, құстардың тоғыз түрін өсіріп, күніне 800, айына 20 мың жұмыртқа сатуға шығарып отырған жас әрі білікті кәсіпкер.

«Жас үздік коммуналдық қызметкер» номи­нациясымен «Маңғыстауэнерго» коммуналдық қазыналық кәсіпорнының электр жөндеушісі Асылбек Қадіров Жолжігітұлы марапатталса, «Жас үздік ұстаз» номинациясы Мұнайлы аудандық өнер мектебінің дәстүрлі ән пәні мұғалімі Темір­бек Асқамбаев Ерсайынұлына берілді. Ол ұс­таздық ете жүріп, облыстық, республикалық жыршылар байқаулардың жеңімпазы атанған. Сонымен қатар 2017 жылы «Атадан­-Мұра» қо­ғамдық қоры президентінің дипломын алған.

«Жас үздік спортшы» номинациясымен 2017 жылы джиу­джитсудан Грекия мемлекетінде әлем чемпионатында 3­орын, Колумбияда ере­сектер арасында өткен әлем чемпионатында 3­орынды иеленген Маңғыстау ауылы бала­лар және жасөспірімдер спорт мектебінің сам­бодан жаттықтырушы­ бапкері Әлия Тілепова Ахметқызы марапатталды.

«Үздік жастар комитеті» номинациясы №8 жалпы білім беру орта мектебі жанынан құ­рылған жастар ісі жөніндегі комитетінің жұмы­сын жандандырып жүрген Мәдина Орынбай Әбиқызына табысталды. Ал, «Жас үздік ауыл маманы» номинациясы Дәулет ауылдық округі әкімі аппаратының нұсқаушысы Ербол Аманов Раимбердіұлына берілді.

Аудан әкімі марапатқа ие болған жастармен естелік суретке түсіп, «Самға» жанұялық тобы Әсет Бейсеуовтің «Жолаушы» әнін орын­дады. Кеш аудан жастарының ән­-күйіне ұласты.

Г. ТАСБОЛАТОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.