Жастар Life ‑ Түпқарағанда

Түпқараған аудан әкімінің қолдауымен, Түпқараған аудандық жастар ресурстық орталығының ұйымдастыруымен 12 тамыз ‑ Халықаралық жастар күні мерекесіне орай 10‑11 тамыз күндері облыстық «Жастар Life» жастар слеті өтті. Слетқа облысымызға қарасты барлық аудандардан және қалалардан белсенді жастар жиналды. Облысымызға қарасты әр ауданнан жиналған жастарды Түпқараған жастары Форт-Шевченко қаласына кіреберіс қақпадан арнайы күтіп алды. «Рухани жаңғыру» бағдарламасы мен Халықаралық жастар күні аясында жүзеге асқан тур-слет барысында облысымыздың түкпір-түкпірінен жиналған белсенді жастары Түпқараған ауданы тарихымен етене танысу мақсатында мемориалдық кешендерді, этнографиялық мұражай мен тынығу орындарын аралады. Каспий теңізі жағасында бас қосып, сұхбаттасып, пікірлесті. Заң ғылымының докторы, профессор, ҚР ҰҒА академигі С.Зимановтың мұражайымен танысу да осы слет бағдарламасына енгізілді. Слет аясында Маңғыстау облыстық жастар ресурстық орталығының директоры, ардагер жайдарманшы, жастар жанашыры Абылай Фазылбекұлымен облыс жастарының кездесуі өтті. Бағдарламаның екінші бөлімі бойынша жастар Захар Дубский бақшасына барып, орналасты. Онда командаларға бөлініп, түрлі спорттық ойындар ойнады, теңізге шомылып, арнайы моторлы қайыққа мініп, теңізде саяхаттады. Кешкісін жастар арнайы ұйымдастырылған квест ойынына қатысып, уақыттарын қызықты өткізді. Кешкі астан соң жастар алау жанына жиналып, Форт-Шевченко қаласының әкімі Өсер Тлеповпен кездесіп, керемет кеш өткізді. Кездесу тек әңгімелесуден емес, әр ауданнан келген өнерлі жастардың домбырада, гитарада ән шырқауымен әсерлі өтті. Би кешінен кейін жастар барлығы жиналып,тамаша әңгіме сұқбат құрысумен таңды қарсы алды. Әр аудан жастары арнайы алғыс хаттармен марапатталып, естелік сыйлықтар табыстады. Тарихы терең, табиғаты тұмса түбекте өткен тур-слет жастардың көпке дейін жадында қалары сөзсіз. Табиғатпен үндесе, достармен сырласа өткізген әдемі слеттың жастар жалғасын тапқанын қалайды.

Гауһар Шамқұлова, Түпқараған аудандық жастар ресурстық орталығының маманы