Маңғыстау ауданы өңірде вакцина алу бойынша екінші орында

Бұл туралы Қоғамдық коммуникация орталығында өткен брифингіде Маңғыстау ауданының әкімі Тілек Көшмағанбетов мәлім етті, деп хабарлайды mangystaumedia.kz.

«Екпе алуда Ақтау қаласынан кейін екінші орында тұрмыз. Ауданда вакцинациялау жұмысы қарқынды. Бүгінде дәрігерлер толықтай, полиция қызметкерлерінің 80 пайызы екпе алды. Мұғалімдер де екпе алып жатыр. Бұдан бөлек ауылдық округтерде ұйымдастыру жұмыстары жүргізілуде. Жалпы ауданда 11 екпе егу пункті жұмыс істейді. Оның ішінде 1 жылжымалы пункт бар», - деді Тілек Көшмағанбетов.

Спикердің мәліметінше, аудан тұрғындарының 18 610-ы егілуге тиісті топқа жатады. Қазір 1-компонентпен - 9 866 адам, ал 2-компонентпен 6 261 адам егілді.

«Жыл басында аудандық ауруханада 1-дәрежелі КВИ бөлімі 20 кереуетпен ашылды. Қазір 180 төсек орынға жеткізілді. Оның ішінде 6 орын жансақтау бөліміне арналған. Аудан бойынша 12 мобильді топ жұмыс істейді. 10-ы ауылдық елді мекенде, 2-і аудан орталығында», - деді Тілек Көшмағанбетов.

Айта кетейік, коронавирус инфекциясының таралуын алдын алу мақсатында ауданда 13 мониторинг тобы құрылып, тиісті жұмыстар атқарылып жатыр. Барлық тойханада мерекелік шаралар өткізуге шектеу қойылған. Қоғамдық тамақтану және сауда орындарында тұрақты рейд жұмыстары жүргізіледі.

Аудандағы 15 нысан «Аshyq» жобасына қосылған. Атап айтқанда, «Қазпочта» АҚ филиалы, аудандық қорғаныс істері жөніндегі бөлімі, Маңғыстау техникалық колледжі және аудандық мұражай. «Аshyq» мобильдік қосымшасына тіркелмеген басқа да кәсіпкерлік нысандарға жаңа жобаға қосылу бойынша ұсыныс берілді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.