Маңғыстау ауданында оттегі станциясы жасақталды

Бұл туралы қоғамдық коммуникация орталығында өткен брифингте Маңғыстау ауданының әкімі Тілек Көшмағанбетов айтты, - деп хабарлайды mangystaumedia.kz сайты.

Оның айтуынша, ауданда коронавирустың екінші толқынына дайындық жұмыстары жүйелі жүріп жатыр. Маңғыстау аудандық ауруханасына жөндеу жұмыстары жүрді. Атап айтқанда, аурухана ғимаратының сырты толықтай сырланып, көлік тұрағы үшін асфальт төселді.

Аурухананың жансақтау бөлімі толық жөндеуден өтті. Шағын оттегі станциясы жасақталды. Ондағы баллондардан оттегі құбыр арқылы 70 кереуетке жетіп тұр. Қазіргі таңда толық дайын.

Сондай-ақ жедел сатыдан бастап жансақтау бөліміне дейінгі жердің еденіне толықтай резеңке төселді. Ол оттегі баллондары мен басқа да керек-жарақ тасыған жағдайда кедергі келтірмейді.

«Аурухананың дәрілік қоры жеткілікті. Аудан көлеміндегі барлық дәріханалардағы дәрі-дәрмек есепке алынды. Қажетті дәрі-дәрмек артығымен келіп тұр», - деді Тілек Көшмағанбетов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.