Дені сау ұрпақ - елдің ертеңгі жалғасы

Биылғы Президенттік Жолдау бір жағынан, кешенді әрі жүйелі, екінші жағынан нақты және бұған дейінгі істермен сабақтасып жатыр. Президент әлеуметтік жаңғырту мәселелеріне айрықша назар аудара отырып, халықтың әл-ауқатын көтеру мақсатында үш тұғырлы тіл мәселесі, халықты сапалы ауыз сумен қамту, ұстаздардың, кітапханашылардың, мұрағатшылардың, көлік жүргізуші сала қызметкерлерінің еңбекақысының мөлшерін арттыру, индустриалды-инновациялық бағдарламаны дамыту, салауатты өмір салтын қалыптастыру мәселелері, сондай-ақ білім-ғылым мәселесіне де мән берді. Егер Жолдауда көрсетілген тапсырмалар оңтайлы жүзеге асса, елдегі жұмыссыз жастар саны азаяды, ал жоғары кәсіби шеберлігі бар жастар саны арта түсері сөзсіз.

Мемлекет басшысы білімнің қолжетімді әрі сапалы болуын қамтамасыз етудің маңыздылығы мен денсаулық сақтау саласын дамыту жайына алаңдаушылық білдірді. Атап айтқанда, әлемдегі күрделі жағдай – пандемияға қарсы күресте қиындықты жұмыла көтеруге шақырып, ахуалдың жақсаруы үшін босаңсуға жол бермеу керектігін атап көрсетті. Дүниежүзін жайлаған қауіпті індетпен күресте ең алдымен, ақ халатты абзал жандарға күш түскені баршаңызға белгілі. Мылтықсыз майданның алдыңғы шебінде жүрген медицина қызметкерлеріне деген жауапкершілік жүгі, індет жұқтырғандар саны артқан сайын еселеп ауырлады. Медицина мамандары алғашқы науқас анықталған сәттен бастап, бірнеше апта бойы отбасыларынан тысқары жүріп, өз денсаулықтарын қатерге тігіп, дертпен күресіп келеді. Осындай қиын сәтте дәрігерлерге құрмет көрсетіп ризашылығын да білдірді. Әлем халқының алаңдаушылығын тудырған пандемия кезінде жан аямай тер төккен дәрігерлер мен ұстаздар қауымына бұл Жолдауда баса мән беріле отырып, еңбектері жоғары бағаланды.

Дені сау азаматтар - мемлекеттің ең бағалы капиталы демекші, кез келген елдің болашағы – оның халқының денсаулығына байланысты. Олай болса, халқымыздың тіршілігі мен бірлігі, жарқын келешегі көп ретте денсаулық мәдениетін қазірден бастап, қаншалықты дәрежеде қалыптасуына байланысты. Ел дамуының басты арқауы - денсаулық және оны сақтау біздің өміріміздегі келелі мәселелердің және еліміз үшін өзекті міндеттердің бірі болып қала берері сөзсіз. Дені сау халық – бай халық, халық денсаулығы мықты болса мемлекеттің де мықты болары сөзсіз.

Теңдік ДӘУЛЕТОВ,
аудандық орталық аурухананың жұқпалы аурулар бөлімінің меңгерушісі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.