Ауыл баласы робот құрастырады

Ауыл баласы технология жаңалықтарынан құр қалып жатқан жоқ. Атап айтар болсақ, Түпқараған ауданындағы «Күншуақ» балабақшаның бүлдіршіндері роботтытехника технологиясын меңгеруде. Роботтытехниканың артықшылықтарын ескерген білім беру саласы заманауи технологияны тәжірибеден өткізіп, балабақшаларға енгізуде. Баланы ерте жастан дамыту, ғылымға қызықтыру мақсатында роботтытехниканы балабақшаға ендіру жұмыстары қарқын алуда.

«Күншуақ» бөбекжай балабақшасына демеуші Айбек Қосуақов атынан бүлдіршіндерге «Робо – әлем» роботтытехника технологиялар орта ығынан роботтытехникалар тарту етілді.

– 5 жасар баланың ойыншығы ретінде көрінетін бұл техника ересек адамның білімін қажет етеді. Робот жасау кез келген адамның ойлау қабілетін дамытады, шығармашылықпен жұмыс жасауға жетелейді. 2019 жылдың желтоқсан айынан бастап ұйымдастырылған оқу қызметтерінде роботтытехника қол­данылып келеді.

Балалардың алған білімін нақтылау мақсатында түрлі тапсырма беріліп, конструкторлық бөлшектер арқылы модель құрастырады. «Lego» компаниясының «Lego education» топтамасы, «Lego education wedo 2.0», «Robot mouse», «Lego education steam park», «Lego education coding express» атты роботтытехника түрлері балабақшадан бастап балаларды робоәлемге баулу, ғылымға қызығушылықтарын ояту.

«Lego» компаниясының «Robot mouse» атты робо жиынтығы арқылы балалар лабиринт ішіндегі ірімшікке жету үшін тышқанға бағыт­-бағдар беріп отырады. Бағыт-бағдарды тышқан үстіндегі бағыттау батырмалары арқылы нұсқайды.

«Lego» компаниясының «Lego education wedo 2.0» базалық топтамасы – балалардың ұсақ маторикасын дамытатын керемет роботты жиынтық. Бұл жиынтық көмегімен балалар «Жануарлар», «Ұшақтар», «Жәндіктер», «Жүк тасушы робот», «Кран», «Құстар» т.б. роботтар құрастыра алады.

Бұл жиынтықта мотор және бағыттаушылар бар. Құрастырып болған соң, оған арнайы алгоритм құрап, бағдарламасын құрады. Бұл қызметте дайын «Lego» компаниясының бағдарламасы – көмекші құрал. «Lego education steam park» және «Lego education coding express» атты роботтытехника түрлері арқылы «Робо – қалашық», «Мамандықтар» секілді ойындар оқу қызметтерінде қолданыс тапты, – дейді балабақша директоры А.Баянова.

Сонымен қатар балабақша тәрбиешісі Гүлнұр Әлиасқарова ауданық және облыстық семинарда роботтытехника технологиясы аясында «Мектепке дейінгі тәрбие мен оқытудағы робототехниканың маңызы» атты баяндамасын ұсынып, облыстағы өзге мектепке дейінгі білім беру ұйымдарына тәжірибемен бөлісуде.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.