Форт-Шевченко қаласында «Ардагерлер үйі» пайдалануға берілді

Ел Тәуелсіздігінің 30 жылдығы қарсаңында Форт-Шевченко қаласының 175 жылдығы, Халықаралық қарттар күніне орай Форт-Шевченко қаласында «Ардагерлер үйі» пайдалануға берілді, деп хабарлайды mangystaumedia.kz.

Жиынға Түпқараған ауданы әкімі Айбек Қосуақұлы, Маңғыстау облыстық Ардагерлер кеңесінің төрағасы Серікбай Құдайбергенұлы, бір топ аудан ардагерлері, ауған ардагерлері, қала, ауыл әкімдері, мекеме басшылары қатынасты.

«Ардагерлер үйінің» ашылу салтанатында сөз сөйлеген аудан әкімі А. Қосуақов ардагерлердің қоғамдағы рөліне, ұрпақ тәрбиесіндегі маңызына тоқталып өтті.

«Халқымызда «Қариясы бар ел – қазыналы ел» деген тағылымды сөз бар. Біз әрқашан қариясын қадірлеп, ардагерін ардақтаған текті елдің ұрпағымыз. Әркез алдыңғы буын аға-апаларымыздың ел дамуы жолындағы ерен ерлігі мен қажырлы еңбегін үлгі тұтамыз. Өйткені, ғұмыры ғибратқа толы ардақты ардагерлердің жүріп өткен жолы – өнеге мен тағылым мектебі. Бүгінде ауданда 67 тыл ардагері және 2 281 зейнет жасындағы қария бар. Олардың әлеуметтік жағдайы, күнделікті тыныс-тіршілігі, тиісті қолдаулар мен жеңілдіктерге ие болуы мемлекет назарында. Бүгін 1 қазан – Халықаралық қарттар күні» мерекесіне орай аудан орталығында «Ардагерлер үйінің» жаңа ғимаратын салтанатты түрде ашу үшін жиналып отырмыз. Ардагерлер отауының ашылуы ұйымның жұмыс аясын кеңейтетіні сөзсіз. Көңілі дария аға буын өкілдері осы орында бас қосып, уақыттарын тиімді өткізумен қатар, түрлі тақырыпта пікір алмасып, қоғам дамуына өзіндік үлесін қосатын болады.

Бұл ғимараттың ашылуына демеушілік көрсеткен Мәжіліс депутаты, меценат Самат Базарбайұлына ерекше алғысымды білдіремін. Биыл ел Тәуелсіздігіне 30 жыл, Форт-Шевченко қаласына 175 жыл толып отыр. Тәуелсіз Қазақстан мен көркейген туған қаламыздың бүгінгідей жетістіктерінің барлығында да сіздердің қолтаңбаларыңыз бар екендігін баса айтқым келеді. Жасым ұлғайды демей, ағайынның арасында елдіктің сөзін айтып, мағыналы өмір сүрудің биік өнегесін көрсеткен ақжарқын пейілдеріңіз бен адал ниеттеріңізге үлкен рахметімді, шексіз алғысымды білдіремін», деді А. Қосуақұлы.

Шара барысында Маңғыстау облыстық Ардагерлер кеңесінің төрағасы Серікбай Төлетов пен Түпқараған ауданының Құрметті азаматы, ардагер Аманғали Күзембаев «Ардагерлер үйінің» салтанатты түрде лентасын қиып, ашып берді.

Бұдан бөлек, Ардагерлер үйіне аудан әкімінің атынан сый-сияпаттар және "НефтестройСервис" компаниясының атынан бильярд үстелі табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.