Мұнайлы ауданында «Мерейлі отбасы» байқауының жеңімпаздары анықталды

Мұнайлы ауданында тұратын Ізтілеуовтер мен Мотыевтар жанұясы «Мерейлі отбасы» байқауының аудандық кезеңінің жеңімпазы атанды, деп хабарлайды mangystaumedia.kz облыстық ҚКО-ға сілетеме жасап.

«Маңғыстау» ауылында тұратын Ізтілеуовтер отбасы бюджет саласында еңбек етеді. Отағасы Әбішбай Ізтілеуов – Мұнайлы аудандық ауруханасында дермотолог дәрігер. Ал отанасы Рызахан Джанабаева – балаларға сапалы білім беріп жүрген ұстаз. Шаңырақ көтергендеріне биыл 43 жыл болды. 3 ер бала, 2 қыз бала тәрбиелеп өсірген Ізтілеуовтер отбасында қазір 15 немере бар.

- Отбасын, отбасылық құндылықтарды сақтай отырып, біреуіміз дәрігер, біреуіміз ұстаздық қызметті атқарып жүрміз. Шаңырағымызда бала тәрбиесін бірінші орынға қойып, үлкенді сыйлау, кішіге ізет көрсету дегендей адами құндылықтарды немерелерімізге, балаларымызға үйретіп айтып отырамыз, - дейді Әбішбай Ізтілеуов.

Ал Атамекен ауылында тұратын Мотыевтар отбасы өнерге жақын. 2 ұл мен 4 қыздың әкесі Қожахмет Мотыев – зейнеткер, біраз жыл білім саласына үлес қосқан ұстаз. Жұбайы Ақорын Мотыева Шымкент музыка училищесін бітіріп, музыка мектебінде домбырадан сабақ берген. Қазір зейнетте. 18 немерені тәрбиелеп отырған үлгілі жанұя.

- Қазақ халқы ежелгі заманнан бері отбасын киелі, қастерлі санаған. Отбасы - қоғамның ұрпақтан ұрпаққа жалғасқан моральдық салт-дәстүрдің, әдет-ғұрыптың сақтаушысы, - дейді Қожахмет Мотыев.

Айта кетейік, енді қос жеңімпаз отбасы ұлттық «Мерейлі отбасы» байқауының облыстық кезеңінде бақ сынамақ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.