Маңғыстау облысында ауылішілік жолдар құрылысының сапасы тексерілді

ҚР ИИДМ-не қарасты жол активтерінің ұлттық сапа орталығы 2022 жылдың 10 айының қорытындысын жариялады. Бүгінгі күнге дейін Маңғыстау облысында 374 рет бақылау шарасы өтіп, жол-құрылыс материалдарынан 1685 сынама алынған. Соның 270-ке жуығы нормативті құжаттар талаптарына сәйкес келмей шықты, деп хабарлайды mangystaumedia.kz орталықтың баспасөзіне сілтеме жасап.

Жыл басынан бері жергілікті маңыздағы автомобиль жолдарына 112 рет бақылау жасалған. Соның ішінде Мұнайлы ауданы Басқұдық ауылында автомобиль жолдарын салу және «Басқұдық елді мекенде жалпы ұзындығы 10 шақырымдық көлік жолын қайта жаңғырту» және Маңғыстау ауданының «Шетпе-Қызан» жолының 85-110 шақырым аралығын қайта жаңарту бойынша жүргізілген жұмыстардың сапасы тексерілді.

Алынған 1024 сынаманың 167-сі талапқа сай емес. Сондай-ақ 23 ақаулық табылды.

«Бұдан бөлек республикалық маңызға ие автожолдарға биыл қаңтар-қазан айлары 262 рет бақылау жүргізілді. 600-ден аса сынаманың 102-сінен сәйкессіздік табылды. Мәселен, инженерлер Құрық-Жетібай бағытындағы жолдың 0-64 шақырымын тексеріп шықты. Күрделі жөндеу жүріп жатқан трассаның осы бөлігінен 69 әртүрлі ақаулық анықталып отыр. Жол салушы мердігер мекемеге барлық кемшіліктерді түзетуге уақыт берілді» - деп хабарлайды ұлттық орталықтың баспасөз қызметі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.