Шебірлік тұрғын ағаштан үй жиhaздарын жасайтын цех ашты

Маңғыстау ауданына қарасты Шебір ауылының тұрғыны 7 жылдан бері жиhaз жасаумен айналысады. Бұл туралы mangystaumedia.kz сайты Маңғыстау ауданы әкімдігінің баспасөз қызметіне сілтеме жасап хабарлайды.

Жиhаз жасап, шағын цехын ашқан Нұрлыбек Мұнаевтың ісі нәтижелі, әрі өнімді. Ол ауыл тұрғындарының тапсырысы бойынша жиһаздарды сапалы етіп дайындайды. Оның бұл қабілеті әкесінен берілген. Айтуынша, әкесі ағаштан тұрмыстық бұйымдар мен ағаш үйдің жабдығын жасаған екен.

«Алдымен тапсырыс берушімен келісіп аламыз. Кейін өлшемін алып, керекті материалдарды дайындап, жиһазды жасауға кірісемін. Шағын ғана цехымда арнайы ағаш кесетін құрылғыларым бар. Тұтынушының көңілінен шығып, ойындағыдай етіп жасауға бар күшімді саламын. Ендігі кезекте мұны одан әрі дамытып кеңейте беремін деген үміттемін», - деді Нұрлыбек Мұнаев.

Шебер қолды Нұрлыбек Мұнаев өз идеясы бойынша түрлі жиhаз шығарған. Жұмыс үстелі, орындық, шкаф, тартпа секілді ағаш өнімдерінің барлығын дайындайды. Тапсырысы көп. Ендігі кезекте мұнымен тоқтамай, алға қарай өрлеп, шағын цехын кеңейтуді көздеп жүр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.