Ұлағатты ұстаз ұлтын сүйетін ұрпақ тәрбиелейді

© Сайт архивінен

Ұстаз – жас ұрпақтың рухани сәулеткері, халықтың үмітін сеніммен тапсыратын сенімді өкілі. Тәуелсіз Қазақстан Республикасының тарихи-әлеуметтік, мәдени-рухани болмысын дамытуда, қоғамдық өмір мен ұлттық мектепті қалыптастыруда ұстаздардың еңбегі зор.

Білім беру кеңістігінде тәжірибелі де білімді, өз мамандығының хас шебері, кәсіби ұстаздар жетерлік. Солардың бірі - Жармыш орта мектебінің қазақ тілі мен әдебиеті пәні мұғалімі Қорғанбаева Арай Қуанышқызы. Ол 1986 жылы 15-сәуірде Жармыш ауылында дүниеге келді. 2007 жылы Ш.Есенов атындағы Ақтау мемлекеттік университетінің филология факультетін қазақ тілі мен әдебиеті пәні мамандығы бойынша үздік бітіріп, алғашқы еңбек жолын 2008 жылы Жармыш орта мектебінде бастады. Ұстаз ана тіліне деген құрметті: «Тілім менің – қуатым! Тұла бойда туа біте тұнатын, Тума ойға тұғыр болып тұратын», – деп түсіндіреді.

Арай – табиғатынан педагогтік, ұстаздық қызметі үшін жаралған жан. Оның бақыты - киелі қазақ тілі мен әдебиеті, алдында отырған оқушылары. Ұстаз алдында отырған әр оқушыны дарынды тұлға деп қабылдайды. Тамыры тереңде жатқан төл әдебиетіміз арқылы ұрпаққа ұлттық тәрбие беру – ұстаздың басты мақсаты. Жас өркенге ұлттың болмысын, тарихы мен әдебиетін танытуда Арайдың еңбегі зор. Осы жылдар ішінде оқушыларға әр заманның сырға толы тарихын, тарихымызда ойып тұрып орын алар ұлы тұлғаларды, әр заман өкілдерін көркем сөзбен көмкеріп, қазақ тілі мен әдебиетіне деген махаббатын оятып жүрген ұстаз. Өз мамандығын жан-тәнімен сүйетін ол мемлекеттік тілді жан-жақты дамытып, мәртебесін биіктету ісіне де қазақ тілі мен әдебиетінің бүкіл құнарлы нәрі мен қадірқасиетін ұрпақтар бойына сіңіру жолында ерекше тер төгіп, өзіндік лайықты үлесін қосып келеді. 2018 жылы мектеп директорының тәрбие жөніндегі орынбасары қызметіне тағайындалды. Қазірге дейін мұғалімдікпен қатар тәрбие жөнінің меңгерушісі қызметін атқарып келеді. Осы еңбек еткен жылдарында Арай біршама белестерді бағындырды. «Ұстаз болу - өз уақытын аямау, өзгенің бақытын аялау», – деп даналарымыз айтқандай, ешқашан уақытпен санаспай, оқушыларының мүддесі үшін аянбай қызмет ететін Қорғанбаева Арай тек оқушы ғана емес, олардың ата-аналарымен де тығыз қарым-қатынас жасап, баланың жан-дүниесі, тыныс-тіршілігінен хабардар болып отырады. Ұлағатты ұстаздың еңбегінің арқасында балалар саналы да зерделі, еңбекқор, адамгершілігі мол, көпшіл, бір сөзбен айтқанда, Қазақстанның патриот ұл-қыздары болып ер жетті. Қазіргі таңда Арай – жаңашыл ұстаз. Себебі жаңалыққа құмар «Тәжірибедегі рефлекция» және «Сабақ үрдісінде 7 модульді тиімді қолдану» жолдарын үйреніп, курстардан өткен. Оның іс-тәжірибесі аудан көлемінде таратылған. Ол мектепішілік «Ой тастау, ойланту» технологиясы тақырыбында коучинг-семинар өткізді.

А.Қорғанбаева шәкірттеріне тіл құдіретіне бас иіп, оның табиғатын тануды, өзгелерге танытуды мақсат етеді. Ұстаз тілегі өз мақсатына жетті. Оның шәкірттері Есенғалиева Фатима республикалық, облыстық жарыстарда қазақ тілі мен әдебиетінен жүлделі орындар алып, ал тәрбие жөніндегі жас мұғалімдері «Сынып жетекші-2020» байқауында жүлделі орындармен көрініп жүр. Өз ісіне шынайы берілген Арай – ұжымдас әріптестерімен білім саласындағы жаңалықтармен, заманауи әдіс-тәсілдерімен бөлісуге құштар жан. Ол – облыстық, аудандық дәрежеде өз іс-тәжірибесімен дөңгелек үстел, шеберлік сыныптары, коучинг жүргізу арқылы және жеке «Көшбасшы» атты блогында ой бөлісіп жүрген ұстаз.

Ұрпаққа сапалы білім, саналы тәрбие беру жолында Арай Қорғанбаева шәкірт жүрегіне шуақ шашқан нұр іспеттес. Облыстық, аудандық пән олимпиадалардан оқушылары жүлдесіз оралмаған. Басқа да сайыстардан алған марапаттары бір төбе...

Арай – қазіргі білім беру жүйесіндегі жаңалықтарды игерген, оқытудың тиімді жаңа технологияларын, жаңаша әдіс-тәсілдерін пайдалана отырып, оқушыларға білім беруде үлкен жетістікке жетіп жүрген білікті басшы, жоғары санатты ұлағатты ұстаз.

Арай Қорғанбаева - жас ұрпаққа білім берумен қатар жас мамандарға да әдістемелік көмегін беріп, жол көрсетіп жүрген ұстаз.

Жаңылсын СҮЙІНҒАРАЕВА,
Жармыш орта мектебінің бастауыш сынып мұғалімі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.