Маңғыстауда каратэ-до Кекушинкайдан ІІ Республикалық ашық турнир өтті

Маңғыстау мұнайының 60 жылдығы, Тәуелсіздіктің 30 жылдық мерейлі мерекесінің қарасаңында Рахмет Өтесінов атындағы спорт кешенінде каратэ-до Кекушинкайдан ІІ Республикалық ашық турнир өтті.

Атаулы даталарға байланысты ұйымдастырылған шараға Республикамыздың түпкір-түпкірінен спортшылар келді. Ел астанасы – Нұр-Сұлтан қаласы, Алматы, Жамбыл, Шығыс Қазақстан, Маңғыстау облысы, жалпы саны алты облыс пен екі қаладан келген спортшылар жарысқа қатысып, бақтарын сынады.

Аталған жарыс Маңғыстау облысының дене шынықтыру және спорт басқармасының және «Ақ жол» партиясының Маңғыстау облыстық филиалының ұйымдастыруымен өтті. Республикалық турнирге қала әкімі М.Ибағаров, қалалық мәслихат хатшысы Т.Мұсаев, Қазақстан жекпе-жек қауымдастығы президентінің кеңесшісі Қ.Нүкенов, Маңғыстау облысының дене шынықтыру және спорт басқармасының басшысы Қ.Қошқарбайұлы және «Ақ жол» партиясының Маңғыстау облыстық мәслихатының депутаты Ж.Матаев пен ҚР-ның Кекушинкай каратэ-до федерациясының президенті М.Асанұлы қатысты. Спорттық шара барысында сөз сөйлеген қала әкімі Мақсат Оңғарбайұлы жас спортшыларға сәттілік серігі болып, әлем чемпионы болуларын тіледі. «Ақ жол» партиясының төрағасы, ҚР Президенті мәжілісінің депутаты Азат Перушаев бейне сәлемдеме арқылы құрамаларды құттықтады.

Шара барысында мың бұралған бишілері қазақ биін билеп, спортшыларды қолдап келген ата-аналардың ыстық ықыласына ие болды. Ал, күміс көмей әншілер, яғни «Қарақат» мектеп студиясының шәкірттері қазақтың ұлттық аспабы жетігенде папури орындаса, Қазақстан дауысы мега жобасының финалисті, қала мақтанышы Данияр Кәрім «Ауылым» әнін шырқап көрермендердің құлақ құрышын қандырды.

Жоғарғы деңгейде өткен турнирге, «Адай автобөлшегі» мекемесі және Жаңаөзен қаласының «Coca Cola» компаниясы мен «Өзенпромгеофизика» АҚ қолдау білдіріп, демеушілік көрсеткен.

Айта кетсек, Жаңаөзен қаласында Кекушинкай каратэ-до шығыс жекпе - жегі 2008 жылдан бері жұмыс жасап келеді. Осы аралықта қаламызда екі рет ҚР чемпионаты және ІІ-рет Республикалық ашық турнир ұйымдастырылған. Шығыс жекпе-жегі бойынша қалада 80 спортшы І, ІІ, ІІІ разрядтты спортшы, 35 – ҚР-ның спорт шеберіне үміткер, 12 – ҚР-ның спорт шебері, екі спортшы халықаралық дәрежедегі спорт шебері атақтарына ие болған.

Бұл спорт түрімен шұғылданатын қала жастары 2011 жылы Франция мемлекетінде өткен Европа чемпионатында 1 алтын медаль, 2013 жылы Әзірбайжан мемлекетінде өткен Әлем чемпионатында екі алтын медаль, 2015 жылы Эстония мемлекетінде өткен Европа чемпионатында күміс медаль және тағы басқа халықаралық жарыстардан жүлделі орындар алған.

Жансая Келдібайқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.