Ш. Есенов атындағы университетте «Парасат жолы» орталығы ашылды

Қаламызға ҚР Сыбайлас жемқорлыққа қарсы іс-қимыл агенттігі Төрағасының кеңесшісі Жазира Жылқышиева және ҚР Жазушылар одағының мүшесі, қоғам қайраткері, республикалық «Парасат жолы» жобасының жетекшісі Сәдібек Түгел жұмыс сапары барысында Шахмардан Есенов атындағы Каспий технологиялар және инжиниринг университетінің кітапханасында «Парасат жолы» орталығын салтанатты түрде ашты, - деп хабарлайды mangystaumedia.kz Маңғыстау облысы бойынша Сыбайлас жемқорлыққа қарсы қызмет департаментіне сілтеме жасап.

Аталған орталық адалдық, парасаттылық, әділеттілік қағидаттарын қалыптастыруға, сондай-ақ ұлттық мәдениет пен руханият құндылықтарын қоғамда ілгерілетуге бағытталған тың жоба. Университет қабырғасында оқытушылық-профессорлық құрамы, студенттер мен облыстың 51 білім ордасы басшыларының қатысуымен өткен келелі кездесуде Жазира Жылқышиева сыбайлас жемқорлыққа қарсы саясаттың жүзеге асырылуы, заңнамалық өзгерістер, сыбайлас жемқорлыққа қарсы мәдениетті қалыптастырудағы ілгерілеулер жайлы сөз қозғады.

Сәдібек Түгел ұлттық мәдениет пен руханият құндылықтарын жастар арасында дәріптеу маңыздылығын атап өтті және «Біздің діліміз – ол біздің психологиямыз, менталитетіміз, пейіліміз бен пиғылымыз, соны өзгерту керек», деді ол өз сөзінде.

Бұдан бөлек, еркін форматта қонақтардың қатысуымен өткен жиында осыдан 3 апта бұрын бастау алған «AntiParaCraft-2021» студенттік квест ойындарының жеңімпаздары марапатталды.
Рухани тұрғыдан пайдасы өлшеусіз болған келелі кездесу қатысушылардың көңілінен шықты, ал қонақтар сапарын Мұнайлы ауданына жалғастырды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.