Баяу мина: Қызылтөбе ауылында тозған газ құбырын ауыстыру жоспарланып отыр

Маңғыстау облысының Қызылтөбе ауылында минаның үстінде отырғандай үрейленіп отырған халық бар. Ауыл тұрғындарының айтуынша, 1991 жылы үйлерге жүргізілген газ жер асты құбыры арқылы берілген. Мұны әкімдік те растайды, - хабарлайды mangystaumedia.kz.

Мұнайлы ауданының Қызылтөбе ауылындағы 1200 үйге газ жер асты құбыры арқылы жүргізілген. Тұрғындарының сөзінше 30 жыл бұрын жүргізілген құбырлардың тозғаны сонша, жарылыс та жиі болады екен.

Газ құбырын ертеде көмген, қазір ол шіріп жатыр. Әр үйдің тұсындағы құбыр жыл сайын шіриді, жерді қазып, құбырдың жаңасын сатып алып халықтың өзі жөндеп отыр, - дейді Қызылтөбе ауылының тұрғыны Қуаныш Сәрсенбаев.

Енді қай уақытта оқыс оқиға болады деп алаңдап отырмыз. Қай жерен жарылып кетер екен деп қорқамыз. Жердің бетіне де құбырларды жүргізіп қойды. Бірақ ол әлі сынақтан өтпеген. Ешқандай жұмыс істелмеді, - дейді тұрғын Бисенбай Түрікменбайұлы.

Ауылға жер үсті газ құбырлары да жүргізілген. Бірақ, көгілдір отынды сол құбырмен жібермей отыр дейді тұрғындар. Оның үстіне, жер асты құбырларында жарылыс болған кезде қызмет көрсететін «ҚазтрансГазаймақ» компаниясы жөндеуге келмейді деп ашулы. Азаматтар амалсыщдан құбырларды өздері ауыстырып жүр екен. Әкімдіктегілердің өзі де жер астындағы тозығы жеткен құбырлардың қауіпті екенін айтып отыр. Мұнайлы ауданы әкімінің орынбасары Нұрбек Қарасаев келер жылы 14 көшенің газ құбыры облыс бюджетінен 700 миллион теңгеге орнатылады деп отыр.

Жер асты құбырлары бойынша жобалық-сметалық құжат жасақталды. Осы жылдың ақпан айында құжат сараптамадан өтті. Содан кейін облыстық бюджетке жолданды. Қазір оның құны 700 миллион теңге деп белгіленіп отыр. 2022 жылы бұйырса қаражат бөлініп, жұмыс басталады деп жоспарлап отырмыз, - дейді Мұнайлы ауданы әкімінің орынбасары Нұрбек Қарасаев.

Ал тұрғындар «Газ құбырына қаражат бөлініп, іс атқарылғанша апаттық жағдайдың болмасына кім кепіл?» деп дабыл қағады.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.