Мұнайлыда дезинфекция жүргізген маманға қатысты сот ісі өтеді

©

Былтыр қараша айында Мұнайлы ауданы Маңғыстау ауылында оқыс оқиға болып, қандаланы улау кезінде 5 адам уланып, олардың екеуі көз жұмған еді. Аталған факті бойынша қылмыстық іс қозғалып, іс сотқа жетті. Үйдегі жәндіктерді улау кезінде бірнеше адамның қайтыс болуына себепкер болған азаматқа қатысты қылмыстық іс Мұнайлы аудандық сотында өтеді. Алғашқы сот отырысы 2019 жылдың 8 сәуірі сағат 10.00-ге белгіленген. Бұл туралы mangystaumedia.kz сайтына Маңғыстау облыстық сотының баспасөз қызметі хабарлады. "Іс материалдарына сәйкес, күдікті азамат 2018 жылдың маусым айынан бастап (нақты күні белгісіз) Алматы қаласында орналасқан "Таракан нет" ЖШС-нің атын жамылып, лицензиясыз жалған жұмыс жасап келген. Ол 2018 жылдың 21 қарашасында сағат 18.00-де Маңғыстау селосы № 42 үйде орналасқан 25 пәтерге үй иесінің тапсырысымен 30 мың теңгеге қандаланы улаған", - деп мәлімдеді облыстық соттың баспасөз қызметі. Улау кезінде "Квикфос" таблеткасын көп мөлшерде қолданған. Үндістанда жасалған препарат тек қана ауыл шаруашылығында пайдалануға арналған», - деп мәлімдеді Маңғыстау облыстық соты. "Улағаннан кейін үй иелеріне және сол үйдің тұрғындарына таблетканың аса улы екенін ескертпей, тек 25 пәтер иелеріне 3-4 күнге дейін үйге кірмеу туралы нұсқаулық берген", - делінген МО сотының хабарламасында. Естеріңізге сала кетейік, нәтижесінде №42 үйдің 15 пәтер тұрғыны 1989 жылы туған Ш.Сүйіндікова мен 28 пәтердің тұрғыны Феруза есімді екі жасар сәби уланып қайтыс болды. Сондай-ақ №42 үйдің тағы 5 тұрғыны ауруханаға жатқызылған. Сол үйдің 240-қа жуық тұрғыны далаға шығарылып, жақын туыстары мен сол маңдағы жатақханаға орналастырылған. Бұған дейін хабарлағанымыздай, күдікті азаматқа қатысты ҚР Қылмыстық Кодексінің 304-бабы 3-бөлігімен (санитариялық қағидаларды бұзу) қылмыстық іс қозғалып, ол 2018 жылғы 24 қарашадан бері үйқамақта болған.