Бүгін әлеуметтік желілерде Ақтаудағы бір мектептің оқушыларының өз сыныптасын темірге скотчпен байлап, басына жұмыртқа лақтырып, сүт төгіп жатқан видео тарады. Осы видеоға қатысты құзырлы органдарға хабарласқан болатынбыз.
Маңғыстау облыстық білім басқармасы тәрбие бөлімінің бас маманы Орынгүл Мамутова былай деді:
«Оқиға 28-ші қыркүйек күні болған. Олардың Ақтау қаласындағы №8 мектептің 8-сынып оқушылары екені анықталды. Видеоны да өздері түсірген. Олар өз сыныптасын скотчпен байлап, орап тастаған. Кейін бала қысылып қалған соң, сыныптастарының бірі оны шешкен. Алайда бұл видео әлеуметтік желіде бүгін тарап отыр. Видеоны 1 қазан күні сынып жетекшілері бар чатқа жіберілген. Іле-шала аталған оқиға 2 қазан күні өткен мектепішілік алдын-алу жөніндегі кеңесте қаралды. Жиналысқа мектеп директоры, тәрбие инспекторы, тәрбие бөлімінің мамандары, сынып жетекшілері, ата-аналар, оқушылар қатысты. Жиынның қорытындысы бойынша Ақтау қалалық әкімдігінің кәмелетке толмаған балалар жөніндегі комиссиясына хаттама жіберілген. Қазіргі таңда құжаттар дайындалуда», - деді ол.
Осы видео бойынша Маңғыстау облыстық Ішкі істер департаменті баспасөз қызметі де мәлімдеме жасады:
"2018 жылдың 28 қыркүйегінде орын алған жағдай бойынша Ақтау қаласының мектеп оқушыларының ата-аналарына қатысты мектеп инспекторымен біріккен шаралар алынды. Бұл бойынша жиналған құжаттар Ақтау қаласы әкімдігінің жанындағы кәмелетке толмаған істері жөніндегі комиссияға қаралу үшін жолданады. Мектеп оқушыларының жасы 14-ке толмағандықтан ата-аналарына түсіндіру жұмыстары жүргізілді. Бұдан кейінгі шешімді комиссия қарайтын болады", - делінген біздің сайтымызға берілген хабарламада.
Бұл комиссияның құрамында Ақтау қалалық әкімінің орынбасары Г.Қалмұратова, МО ІІД-нің орынбасары, Ақтау қалалық мәслихат депутаты Б.Түркменбаева, Ақтау қалалық білім бөлімінің басшысы, Ақтау қалалық әділет департаментінің басшысы, Ақтау қалалық спорт бөлімінің басшысы, Ақтау қалалық жұмыспен қамту бөлімінің басшысы, психолог, "Мейірім" қоғамдық қорының басшысы, Маңғыстау арнасының журналист-редакторы Әсем Сартбаева бар.
Осы мәселе бойынша хаттама қашан келіп түсті, отырыс қашан өтеді деп комиссияның өкілі Бағдат Тұрғамбаеваға хабарласқанымызда, "бұл - мектеп оқушыларының туған күн тойлаудағы әдісі" екендігін айтты:
"Аталған видео әлеуметтік желіге 5 қазан күні шығып, сол күні бізге мәлімдеме түсті. 8-сынып оқушылары мұғалімдер күніне орай өздерінің арасындағы туған күн тойлаудың әдісі ретінде сыныптастарын скотчпен 14 мәрте ораған. Бұл балалардың бір-бірін құттықтауы деп, балалардың ата-аналары түсіністік білдіріп, бір-бірін кешірген. Қазіргі таңда Ақтау қалалық әкімдігі жанынан құрылған Кәмелетке толмаған балалар құқығын қорғау жөніндегі комиссияға материалдар жинақталып қойды. Комиссия құрамы бірнеше жылдан бері қызмет жасап келеді. Енді комиссия өкілдері тек талқылап қана қоймай шешімін шығарады. Оқиғаға қатысты барлық мәліметтер жинақталып, отырыс басқаларға сабақ болсын деген мақсатта өткізілмек. Қандай шаралар қолданылатыны айтылып, бала құқығын қорғауға байланысты барлық мәселелер қаралады", - деді Ақтау қалалық білім бөлімінің жалпы орта білім мемлекеттік қызмет бойынша сектор меңгерушісі, комиссия өкілі Бағдат Тұрғамбаева.
Бір балаға он бала жабылып, темірге байлап, жұмыртқа лақтырғаны қайдан пайда болған әдіс? Туған күнді бұлайша тойлауды оқушылар қайдан үйренген? Фейсбук қолданушылары он бала бір балаға жабылып, ұн шашқаны корей фильмдерінде көрсетілетінін айтады, бәлкім солардан көріп үйренді ме, қалай?
Асылзат ӨСЕРҚЫЗЫ
Скриншот видеодан алынды
[gallery td_select_gallery_slide="slide" ids="63143,63144"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
