Назарбаев мектебінде «Берік отбасы» курсы өтті

Ақтау қаласындағы Назарбаев зияткерлік мектебінің 7 «а» және 7 «в» сынып оқушыларының ата-аналары 9 қаңтар – 16 ақпан аралығында Оксфорд Брукч университетінің мұғалімдері дайындаған «Берік отбасы» курсын оқыды. Бұл туралы Ақтау қаласындағы химия-биология бағытындағы Назарбаев зияткерлік мектебінің баспасөз қызметі хабарлады. 7 сессиядан тұрған психологиялық тренингке 11 отбасы қатысты. Отбасы құндылықтарын қалыптастырып, ата-ана мен баланың арасындағы қарым- қатынасты жақсартуға және психоактивті заттардан сақтану жолдарына арналған курсты мектеп психологтары және педагог-куратор Бибігүл Арыстанова жүргізді. Шараны ұйымдастырудағы басты мақсат – отбасы мүшелерінің қарым-қатынасын жақсартып, ата-ана баланы, бала ата-ананы түсініп, жанұядағы ынтымақтастық пен берекені икемділік арқылы дамыту. - Курс 10–14 жастағы балалар мен олардың ата-аналарына арналған. Сабақ барысында біз жасөспірімдердің күйзелісінің ерекшеліктерін, айналасындағы ортамен қарым- қатынасын, өзіне деген сенімнің қалыптасуын зерттедік. Сондай-ақ отбасындағы шектеулерге, конфликт жағдайындағы баланың өзін-өзі ұстауына назар аударып, баланы күшпен тәрбиелемеу жолдарын қарастырдық. Бағдарламаның ең маңызды тұсы бұл – топтық динамика. Команда мүшелері өзінің жанындағы адамның мықты тұстарын таба білді, – дейді психолог Тілектес Оразбергенқызы. Мектептегі психолог, ұстаздардың айтуынша, курстың екі дәрісінен кейін-ақ, топ мүшелері ауызбіршілік танытып, өзара жақын тіл табыса бастапты. Соны- мен қатар, сабақ барысында ата-аналар балаларын жаңа қырынан танығандарын да атап өтті. – Балаларға стресс дегеннің не екенін, одан шығу жолдары, отбасылық тәртіпті сақтау, үлкендерде туындайтын қиындықтар туралы айтылды. Жобаның бір ерекшелігі қатысушыларға тек қана лекция оқыла бермей, әр түрлі ойындар, топтық жұмыстар жасау арқылы түсіндірдік, – дейді куратор Бибігүл Абатқызы. Тренерлердің айтуынша, жобаның тиімділігін анықтау мақса- тында отбасылар әлі де бақылауда болады. Мұнымен қоса курс жетекшілері команда мүшелерінің білімін өзге де сыныптағы оқушыларға тарату мәселесін жолға қоюды жоспарлап отыр. Айта кетейік, «Берік отбасы» психологиялық курсын Ұлыбританиядағы Оксфорд Брукс университетінің мамандары бірігіп жасаған. Қазіргі таңда жоба әлемнің 35 еліне енгізіліп, орыс, испан, неміс, португал, француз, қытай тілдеріне аударылған. 2018 жылдың қараша айында Ақтау қаласындағы Назарбаев зияткерлік мектебінің психологі Тілектес Маскарова мен педагог-куратор Оксфорд Брукс университетінің аға мұғалімі, философия ғылымдарының докторы Дебби Ален және Линдси Клубстан бағдарла- ма бойынша білім алған.

Асылзат ӨСЕРҚЫЗЫ