«Жұлынқұрт» спектаклі көрермен назарына жаңа құраммен ұсынылды

«Жастар жылы» аясында облыс әкімдігінің қолдауымен, Маңғыстау облысының жастар саясаты мәселелері басқармасының ұйымдастыруымен, Қазақстанның «Ақ жол» демократиялық партиясы Маңғыстау облыстық филиалы жанындағы «Ақ жол – жастар» жастар қанатының әуесқой әртістері жуырда Мұнайлы ауданы, Қызылтөбе ауылының мәдениет үйінде есірткі зияны мен кесапаты туралы «Жұлынқұрт» атты драмалық қойылымды жаңа құраммен қайта көрермен назарына ұсынды. Бұл қойылымның авторы – драматург, ұстаз Өтен Ахмет. Жаңадан келген жастардың бойына сахна ережесін сіңірген, осы қойылымға дайындаған «Ақ жол» жастар театрының жетекшісі Ғазиза Бақтиярқызы. Қойылым тақырыбы жастар арасында нашақорлықтың алдын алу, нашақорлықтың зардабы және қасіреті туралы. Жұлынқұрт, яғни есірткі – ХХI ғасыр дерті. Осы дерт қоғамымыз­ға кеңінен жайлап кетпей тұрып, жастарды сақтандыру. Осы кеса­паттың салдарынан талай жас көктей солды. Бұл – жастарға дұрыс жол сілтеу бағытында жарыққа шыққан драмалық қойылым. – Жастар театрына келгеніме бес ай болды. Сол аралықта шағын қойылымдарды сомдап жүрдім. Ал мұндай үлкен спектакльде алғаш рет ойнауым. Мен есірткі сатушы, наркокурьер образын көрсеттім. Мұны шығару қиын болды. Се­бебі рөлім жағымсыз кейіпкер болғандықтан, соққыға жығу, те­мекі, наша тарту көріністері бар. Бірақ өмірде мұндай дүниелерден аулақ болуды және осы арқылы өзім сияқты жастарға тәрбиелік көзқарас қалыптастырамын деп ойлаймын. Бұл жастар қанаты маған қоғамда өз орнымды табуға үлкен мектеп, – дей­ді жас актер Жанкелді Уркенбаев. Қойылымда есірткінің құрбаны болған қазақ жастарының тағдыры­ мен бір ғана отбасындағы жағдай арқылы қоғамдағы трагедия көр­сетіледі. Ананың қадірі, достың маңызы, шынайы махаббат, кір шалмаған сезім бір арнаға тоғысқан қойылым келген көрерменнің көзіне жас келтірді. Қойылымның жастарға берер өнегесі мен рухани тәрбиесі өте мол.

Асылзат ӨСЕРҚЫЗЫ