"Жыр жебенің" шәкірті республикалық айтыста бас бәйгені жеңіп алды

Көктен түскен төрт кітаптың бірі Інжілде «Ең әуелі сөз болды» дейтіні көп нәрсені аңғартатын сынды. Осы күні айтыс өнерін тек қазаққа ғана теліп қоятын әдет жоқ емес. Поэзия – қиял бүрлеген өнердің шыңы, адамзат баласына қалай ортақ болса, айтыс та солай. Ежелде Еуропа елдерінде айтыстың дамығаны сонша, математикалық айтыс түрлеріне дейін болғаны қарт тарихпен сырлассаңыз өңі ұшыраса кетеді. Яғни айтыс та адамзаттың ортақ еншісі. Көшпелі ғұмырдың көркін келтірген айтыс бүгінгі күні жоққа сіңіп кетпей, ел арасында жүргені қазақтың бір бағы да шығар! Біреу білсе біреу білмес, Маңғыстау топырағының даңқын асырып, сөз қадірін ұғынар ұрпақ тәрбиелейміз деген ниетпен қаламызда 2015 жылы «Жыр жебе» жас айтыскерлер клубы құрылған. Облыстық мәдениет басқармасының қолдауымен, айтыскер ақын Нұрлан Мұсаев негізін қалаған клубтан талай шәкірт түлеп, алды республикалық додаларда көш бастап жүр. Бұл сөздің дәлелі ретінде жуырда ғана Алматы облысы Жамбыл ауданы Ұзынағаш кентінде өткен "Жыр алыбы - Жамбыл" атты республикалық оқушылар айтысында аталған клубтың түлегі Мейірбек Саламатовтың бас бәйгені жеңіп алғанының өзі де жеткілікті. Дәстүрлі түрде жыл сайын өткізілетін республикалық додаға әр облыстан суырылып шығып, іріктеуден өткен 28 ақын қатысқан. Оның үшеуі Маңғыстау облысынан, атап айтар болсақ: жеңімпаз атанған Мейірбек Саламатов (Мұнайлы ауданы), Жанболат Әлиев (Қарақия ауданы), сондай-ақ Алшын Сүйемов (Ақтау қаласы). Үш күн бойы өткен айтулы айтысқа Айтақын Бұлғақов төрағалық еткен. Клубтың алдағы жоспарларымен танысып, өнерге жаны құштар жастарға қаншалықты деңгейде қолдау білдіре алатыны жөнінде айтыскер ақын Фархад Мұсаев біраз жайды баяндаған еді: - Мектеп қаламызда орналасқан соң қаланың төңірегіне жақын тұрған, қатынауға мүмкіндігі бар оқушыларымыз ғана келіп жүр. Алда клуб орталықтарын кеңейтсек деген ниет бар. Мұнайлы ауданы, Түпқараған ауданына қарасты Сайын Шапағатов, Ақшұқыр ауылымен қоса, алыс жерлерден қалаға студент болып келген дарынды жастарымыздың саны жетерлік. Негізгі мақсатымыз – ел аумағына танымал айтыскерлерді шығарып, ұлтты сүйер, сөз қадірін түсінер жастарды өнерге баулу, - деп атап өтті.

                       Мадияр ТӨЛЕУОВ