Ақтаудағы пандустар талапқа сай ма?

Аймақ басшысы Ералы Тоғжанов бірнеше әлеуметтік нысандарды аралап, мүгедектердің мініп-түсуіне арналған пандустарды тексеріп шықты. Тексеру барысында мекемелердің пандустары мүлде талапқа сай еместігі анықталды. Алдымен Халыққа қызмет көрсету орталығынан басталған шара, қалалық әкімдікте, облыстық ауруханада жалғасты. Ондағы салынған пандустардың жағдайы мәз емес. Тым биік, қысқа және қауіпсіздік ережелері сақталмаған. Оны әкіммен шараға бірге қатысқан бірінші топ мүгедегі  "Тәуелсіз өмір" қоғамдық бірлестігінің төрағасы Руслан Ғайбатов та растап отыр. «Пандустарға өздігіңнен мініп-түсу өте қиын. Олар тым биік болғандықтан, қасымызда адам жүрмесе, артқа қарай құлап кетуіміз мүмкін. Сол үшін өзгенің көмегіне жүгінбей-ақ, биік пандустың орнына электр қуатымен жұмыс жасайтын арба көтергіш жедел саты орналастырса жақсы болар еді», - деп өз ұсынысын жеткізді ол. Осы жағдайларды өз көзімен көрген өңір басшысы айтылған ұсынысты құптап, арнайы мамандарға міндеттеме жүктеп, жедел түрде іске кірісуді тапсырды. Шара соңында Е.Тоғжанов облыстық мүгедектік спорт клубына барып, ондағы мүмкіндігі шектеулі спортшылармен кездесті. Олар күнде осы орталыққа келіп, жаттығу жасап, спорт түрлерімен айналысып, уақыттарын тиімді әрі қызықты өткізеді. Солардың бірі - үстел теннисімен шұғылданып жүрген Мейірбек Өтепов. Екі жылдан бері сүйікті ісін жанына серік еткен ол спорт шеберіне үміткер. Соны ескерген облыс әкімі Мейірбекке жаңа спорттық арба сыйлады. «Бүгін күтпеген жерден облыс әкімі Ералы Тоғжанов келіп, маған арнайы үстел теннисіне арналған қоларба сыйлады. Бұрын өзімнің арбам ыңғайсыздау еді. Дәл осындай арба керек болып, армандап жүр едім», - деп қуанышын жеткізген Мейірбек аймақ басшысына алғысын білдірді. Кездесу барысында Е.Тоғжанов Ақтөбе қаласында өтетін 5-ші паралимпиадаға дайындалып жүрген Мейірбекпен үстел теннисін ойнап, көңіл-күйін тағы бір мәрте көтеріп тастады. Осылайша облыс халқының әлеуметтік мәселелерін үнемі басты назарға алатын өңір басшысы тиісті мамандарға тексеріс барысында анықталған олқылықтарды жоюды тапсырды. Айта кетсек, қазіргі таңда Ақтау қаласының өзінде 6900-дей мүмкіндігі шектеулі жан тұрады, оның ішінде 600-ден астамы арбаға таңылғандар. Қалада 1500-ден астам ғимарат бар. Құрылыс нормалары бойынша мүмкіндігі шектеулі жандар қатынайтын мекемеге кірер есіктің ені - кемінде 1,2 м болуы шарт. Ал, есіктің табалдырығы болған жағдайда, оның биіктігі 2,5 см-ден аспауы қажет. Баспалдақтардың биіктігі 12-15 см болуы - заңдылық. Аталған талап бойынша қызмет иелерінің және заңды тұлғалардың немесе кәсіпкерлікпен айналысатын жеке тұлғалардың мүгедектердің әлеуметтік және көлік инфрақұрылымы нысандарына кедергісіз өтуін қамтамасыз етпеуі, айыппұл түріндегі әкімшілік жауапкершілікке әкеледі. Қызмет иелеріне салынатын айыппұл мөлшері 50 айлық есептік көрсеткішті құраса, шағын кәсіпкерлік субъектілеріне – 120 АЕК, орта кәсіпкерлікке – 200 АЕК, ірі кәсіпкерлік санатына 400 АЕК болып есептелген. Елбасының 2018 жылғы 5 қазандағы «Қазақстанның әл ауқатының өсуі: табыс пен тұрмыс сапасын арттыру» атты Қазақстан халқына Жолдауында «Мүмкіндігі шектеулі адамдар үшін елді мекендерде «кедергісіз орта» құру бойынша шаралар қабылдау, оның ішінде осы мәселені шешуге қоғамдық бақылауды күшейту» туралы айтылды. Осыған орай Қазақстан Республикасының «Қазақстан Республикасының мүгедектердi әлеуметтiк қорғау туралы» Заңына сәйкес кәсiпкерлiк қызметтi жүзеге асыратын жеке тұлғалар, сондай-ақ заңды тұлғалар мүгедектерге ортақ пайдаланылатын көлiк құралдарына, тұрғын үйлерге, қоғамдық және өндірістiк үйлерге, ғимараттар мен үй-жайларға кедергiсiз кiрiп-шығуына, әуежайларда, темiр жол вокзалдарында, автовокзалдарда, автостанцияларда, теңiз және өзен порттарында еркiн бағдар ұстануы мен жүрiп-тұруына мемлекеттiк стандарттарға сәйкес жағдай жасауға мiндеттi. Аталған объектiлердi мүгедектердiң кiрiп-шығуына бейiмдеу мүмкiн болмаған жағдайларда, тиiстi жеке және заңды тұлғалар олардың қажеттiлiктерiн барынша ескеретiн керекті шараларды әзiрлеп, жүзеге асыруға тиiс.

Айгүл ОРЫНБАЕВА,

Суреттерді түсірген Серік МАЙЕМЕРОВА