©
Бас миының жарығы диагнозымен туған маңғыстаулық сәбиге жасалған екінші ота сәтті өтті. Ота Нұр-Сұлтан қаласындағы Ұлттық нейрохирургия орталығының балалар нейрохирургия бөлімшесінде жасалған. Астаналық дәрігерлер сәбидің бас миының үлкен жарығын алып тастаған, - деп хабарлайды mangystaumedia.kz сайты.
«Елордада отаны білікті нейрохирург дәрігер, балалар нейрохирургиясы бөлімінің меңгерушісі Ғабит Өлеңбай және жоғары нейрохирург Абай Исканов жасады. Ота сәтті өтті. Қазір бала өзін жақсы сезінеді», - дейді Маңғыстау облысының Денсаулық сақтау басқармасының баспасөз қызметкері. Ұлттық нейрохирургия орталығында өткен ота кезінде бас сүйек-ми жарығын кесуге және жарықтық тесігін бітеуге мүмкіндік беретін микрохирургиялық техника қолданылған. Айта кетелік, бұл - Сафия есімді жаңаөзендік сәбиге жасалған отаның екінші кезеңі. Бұған дейін, 2019 жылдың 3 ақпанында Маңғыстау облыстық перинаталдық орталығында вентрикулоперитониальды ұштастыру отасының 1-ші кезеңі жасалған. Оған ана құрсағында жатқан кезде орталық жүйке жүйесінің туабітті даму ақауы, ми жарығы, бас сүйегінің артқы шұңқыры менингоцелесі, Денди Уокер мальформациясы диагнозы қойылған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
