Былтыр Маңғыстауда 115 дзюдошы "спорт шеберіне үміткер" атанған

©

Ақтауда дзюдомен 3 000, облыста 6 000 спортшы тұрақты шұғылданады. Ал 2018 жылы бұл спорт түрінен ересектер құрамасы ҚР чемпионатында  жалпыкомандалық есепте екінші орынға тұрақтаған. Бұл туралы Маңғыстау облыстық спорт басқармасы мен дзюдо федерациясының біріккен жиынында айтылды, - деп хабарлады mangystaumedia.kz сайты. Оған облыстық спорт және дене шынықтыру басқармасының басшысы Рамазан Саттыбаев, Дзюдо федерациясының президенті Асылбек Жолдыбаев және бапкерлер,  спорт мектептерінің басшылары, төрешілер қатысты. Басқосуда былтыр атқарылған істердің қорытындысы жасалып, 2019-2020 жылға жоспар талқыланды. «Маңғыстауда 1 халықаралық,  3 республикалық турнир ұйымдастырылып тұрады.  Мәселен, Тұрар Жолдыбаев атындағы халықаралық турнир 2018 жылдан бастап ашық Азия кубогы деңгейіне көтеріліп олимпиадалық ұпайлар берілген. Сондай-ақ Маңғыстаудың жастар құрамасы Азия, Европа кубоктарынан жүлдесіз қайтпады», - дейді МОДФ атқарушы директоры Рахмет Кетеев. Былтыр 115 спортшы "спорт шеберіне үміткер"  атағын иеленді. Ал биыл 10 "спорт шебері",  200 "спорт шеберіне үміткер" шығады деген үмітте. Кездесуде бапкерлер мен төрешілер тарапынан біліктілікті арттыру,  ауыл балаларын оқу жаттығу жиындарына жиі қатыстыру, өңірде республикалық,  халықаралық деңгейде біріккен ОЖЖ өткізу сынды ұсыныстар айтылды.

Ақкенже БЕРКЕНОВА