Ұрлаған ноутбукты алдап сатқан алаяқ істі болды

©

Ақтау тұрғыны танысының ноутбугын ұрлап алып, интернет арқылы сатып жіберген. Ноутбукты алу үшін хабарласқан келесі адамға сатылып кеткенін айтпай алдап шақырады. Онымен уәделескен жері 12 шағынауданда кездесіп, ұрып 170 000 теңгесі мен әмиянын тартып алып кеткен. Бұл алаяққа қатысты қылмыстық іс Ақтау қалалық сотында қаралды, - деп хабарлайды mangystaumedia.kz сайты. Сотта анықталғандай, айыпталушы З.  жәбірленуші А-ның «AcerPredatorHelios-300» маркалы ноутбугін ұрлап, ғаламтор желісіндегі «Olx.kz» жарнама сайтында белгісіз адамға 200000 теңгеге сатып жіберген. Сонымен қатар ол тағы да алаяқтық әрекетіне басып жәбірленуші Н-ны алдап, сатылып кеткен ноутбукті 170000 теңгеге сататынын айтқан. Жәбірленуші Н-мен келісіп 12 шағынауданға шақырған. Оны ұрып құлатып, күртешесінің қалтасынан 170000 теңгесін және жеке куәлігі салынған әмиянын тартып алып, оқиға болған жерден ізін суытқан. Нәтижесінде, жәбірленушінің денсаулығына орташа дәрежеде дене жарақатын келтірген екен. «Айыпталушы Н. танысы І-нің үйіне барып, жәбірленуші Н-ны ұрып қалтасынан әмиянын тартып алып кеткенін айтқан. Сонымен З-ға қатысты  ҚР ҚК-нің 188-бабының 1-бөлігімен, 192-бабының 1-бөлігімен және танысы І-ға қатысты 432-бабымен  қылмыстық іс қаралды», - дейді Маңғыстау облыстық сотының баспасөз қызметкері. Сот үкімімен І-ға ҚР ҚК-нің 432-бабымен  кінәсіз деп танылып, оның әрекетінде қылмыстық құқық бұзушылық жасауға қатысуы дәлелденбеуіне байланысты ақталды. Ал сотталушы З. ҚР ҚК-нің 188-бабының 1-бөлігімен, 192-бабының 1-бөлігімен кінәлі деп танылды. Оған 4  жыл мерзімге  бас бостандығынан айыру жазасын тағайындалды.

Ақкенже БЕРКЕНОВА

Көрнекі сурет сайт архивінен