Ақтауда полицейлер көлік жүргізушілердің сұрағына жауап берді

Бүгін Ақтауда дәстүрлі «Жолда қабылдау» республикалық акциясы басталды. Бұл акция ертең де жалғасын табады. Ол әр үш ай сайын өтіп тұрады. Жол-көлік оқиғаларының алдын алу, азаматтарға жол қозғалысы жөніндегі заңнаманы түсіндіруді мақсат тұтады, - деп хабарлайды mangystaumedia.kz сайты. Акцияға «Нұр Отан» облыстық партиясы мен Әкімшілік полиция басқармасы, Полиция департаменті, Жергілікті полиция қызмет басқармасы, Көші-қон қызметі басқармасының өкілдері де қатысты.   «Бұл - барлық өңірде өтіп жатқан республикалық акция. Тұрғындардың көп келетін жерінде өткізуді көздедік. Халықтың сұрағына тиісті мамандардан жауап алады. Сондай-ақ арнайы жәшікке ұсыныс, шағым, өтінішін қалдыра алады. Жауабы сайтқа жарияланады. Егер осы акцияға келе алмаса  47-47-27 телефон нөміріне қоңырау шалып, сауалын қоюға болады. Оған міндетті түрде жауап беріледі», - дейді МО Полиция департаментінің бастығының орынбасары Бердібек Нысанбаев. Шараға қатысқан көлік иелері жол ережесін бұзғандарға салынатын айыппұл, автокөліктің техникалық жағдайы, жол қозғалысы ережесінің бұзылуы секілді мәселелерді көтерді. Сұрақ: Ауыр жүк көлігін жүргізу үшін қандай категория алу керек? Жауап: Қазір 2014 жылдан бастап жол жүру заңына сәйкес өзгерістер енгізілген. Жүргізу куәлік алатын кезде кіші санатын алу керек, содан кейін категория алады. Сізге ауыр жүк көлігін айдау үшін СЕ санатын алу керек. Сұрақ: Өзім 12 шағынауданда тұрамын. Жолда кейбір жүргізушілер жаяу жүргіншілер жолының үстінде тоқтап, көліктерінен адам түсіреді. Салдарынан артында тұрған көлік күтіп тұруына мәжбүр. Жүргізушілерді де түсінуге болады, арнайы тұрақ жоқ. Жолдың ені 6-ақ метр. Бұл оқылықты дұрыстасаңыздар екен. Жауап: Сұрағыңыз орынды.  Әзірге бұл жерді тәртіп сақшасы бақылайды. Болашақта 2 жолақты жол жүргізіп, жер асты және жер үсті жаяужүргіншілер өткелін саламыз. «Көбі айыппұлды электронды түрде төлей алатынын білмейді. Біз айыппұлы төленбеген азаматтарға «egov.kz»  электрондық үкімет порталының көмегімен онлайн режимде төлеуге болатынын жеткіздік», - дейді полиция қызметкерлері.   Шараны ұйымдастырушылар тұрғындардың сұрақтарына жауап берумен шектелмей, сауалнама да жүргізді. «14 шағынауданда жаяу жүргіншілер жолын бағдаршаммен реттелгеніне алғыс айтамын. Кейбір жаяу жүргіншілер жолы көрінбей қалған, барлығын сырлап боясаңыздар екен», - дейді шаһар тұрғыны. Жауап: 15 мамырға дейін жол белгілерін жаңартпақпыз. Басқа да ұсыныстарыңызды айтсаңыз жергілікті атқарушы органдарға және негізгі мамандарға жолдаймыз. https://youtu.be/BAXL6KxtsEM Айта кетейік, 14 шағынаудандағы №1 мектептен жағалауға өтетін жаяу жүргіншілер жолағына бағдаршам орнатылды. Тәртіп сақшыларының айтуынша, бұл ең бірінші кезекте жол-көлік оқиғаларының алдын алады, кептеліс болмайды. «Тұрғындар өткелден өту үшін тетікті басып, бағдаршамда жасыл түс жанғанша 3 минут күтуі қажет. Содан кейін 20 секунд аралығында өтеді», - дейді Бердібек Нысанбаев.   Сонымен қатар егде жастағы адамға, балаларға, мүгедек жандарға ыңғайлы етіп баспалдақ жасалған. «Жаяу жүргіншілер жолына бағдаршам орнатқаны, баспалдақ  салғаны жақсы болды. Жағалауға барғымыз келгенде бұл жерден әрең өтетінбіз. Енді алаңдауға негіз жоқ», - дейді қала тұрғыны.

Ақкенже БЕРКЕНОВА

Суреттер мен видеоны түсірген Талант ҚҰСАЙЫН

[gallery td_select_gallery_slide="slide" ids="76889,76888,76887,76886,76885,76882,76881,76880"]