Биыл Маңғыстауда 60 өрт оқиғасы тіркелді

Маңғыстау облысында биыл 60 өрт оқиғасы тіркелді. Оның 22-сі тұрғын үйлерде, 77-сі автокөліктерде болды. Өрт кезінде 1 адам қаза тауып, 18 млн 12 мың 400 теңге шығын келген. Бұл туралы бүгін Өңірлік коммуникация қызметінде өткен брифингте Маңғыстау облыстық Төтенше жағдайлар департаментінің басшысы Қуанар Базарбаев мәлімдеді, - деп хабарлайды mangystaumedia.kz сайты. Төтеншеліктер тұрғын үйлерде өткізген үгіттеу-профилактикалық жұмыстың арқасында былтырмен салыстырғанда өрт 26%-ға, ал автокөліктердегі өрт 15%-ға азайған. Жыл басынан бері өрттен 11 адам құтқарылып, 137 адам көшірілген екен. "Адамдардың қаза болуы мен жарақаттануының алдын алу, өрттердің санын азайту мақсатында қарт адамдары бар тұрғын-үйлерге, жұмыссыздарға, көп балалы отбасыларға өрт қауіпсіздік талаптарын сақтауды түсіндірдік", - дейді Қуанар Базарбаев. Оның айтуынша, автокөліктердегі өртті  болдырмау үшін жергілікті полиция қызметімен бірлесе қалалық және аудандық бөлімшелер рейд өткізіп, 1340 жаднама таратқан. Департамент басшысы өзге облыстармен салыстырғанда аймақтағы құтқару қызметінің техникалық жабдықталуы жоғары деңгейде екенін атап өтті. Алайда арнайы техника әлі де қажет екенін алға тартты. «Жалынның ауқымы 20-25 метрде, тіпті 60-70 метр маңайына жолау қиын. Енді өртті ауыздықтайын десек желдің бағыты ауысып кетіп, қиындық тудырады. Соған байланысты бізге техника қажет. Бұл жағдай құзырлы органдарға айтылды», - деді ол. Сонымен қатар төтеншеліктер су тасқынын алдын алуға толықтай дайын екенін жеткізді. «Су басу кезінде қиындық туған жағдайда әкімдікпен бірігіп облыстың азаматтық қорғау қызметінің 924 адам, 308 техника және 10 жүзу құралы жұмылдырылып, дайындықтан өткен. Су тасқынының алдын алуға және жоюға қажетті көлемде материалды-техникалық қамтамасыздандыру резерві, сонымен қатар облыс әкімдігінен қаржылық резерв қарастырылған», - дейді Қ. Базарбаев.

Ақкенже БЕРКЕНОВА

Суретті Өңірлік коммуникация қызметі ұсынды