Маңғыстау облысынан 70-ке жуық спортшы 5 қыркүйекте Астанада өтетін ұлттық спорттың басты турниріне қатысады. Бұл туралы Қоғамдық коммуникация орталығында өткен брифингте Маңғыстау облыстық дене шынықтыру және спорт басқармасының басшысы Қанат Жұмабаев айтты, деп хабарлайды mangystaumedia.kz сайты.
Қазақстанда төрт жыл сайын өтетін ұлттық спорттың басты додасында өңірлер асық ату, аударыспақ, бәйге, дәстүрлі садақ ату, жамбы ату, жекпе-жек, көкпар, қазақ күресі, құсбегілік, теңге ілу, тоғызқұмалақ спорт түрлері бойынша жарысады.
Спикердің айтуынша, фестивальда еліміздегі ұлттық спортты жоғары деңгейде дамытып отырған үздік 3 өңір анықталады. Аталған жарыста еліміздің барлық өңірінен 11 спорт түрі бойынша 1362 спортшы бақ сынайды. Фестивальдің бағдарламасына «дәстүрлі садақ ату» (жерде тұрып садақ ату) спорты тұңғыш рет қосылып отыр. Сонымен қатар, көкпардағы жекпе-жек аттардың жеке жарысы көрсетілім ретінде енеді.
- Ашылу салтанатында Маңғыстау облысының туын құсбегіліктен ҚР 3 дүркін жеңімпазы, Әлем чемпионатының қола жүлдегері, спорт шебері Айшуақ Тайманов алып шығады. Команда сапында қазақ күресінен Әлем чемпионы Нұрдаулет Жарылғапов, жекпе-жектен Азия чемпионы Серікбай Ходжабаев, дәстүрлі садақ атудан халықаралық жарыстың жеңімпазы Самал Зұлпыхаров, тоғызқұмалақтан Азия чемпионы Тұрақбай Жұмакелді сынды спортшыларымыз облыс намысын қорғайды,- деді Қанат Жұмабаев.
Брифинг барысында Маңғыстау облысының ұлттық спорт түрлері орталығының директоры Қайрат Бурбасов өңірде ұлттық спортпен шұғылданушылар саны былтырғы жылмен салыстырғанда артқанын мәлімдеді.
- Маңғыстау облысында ұлттық спортпен шұғылданушылар саны 24 146 адамды құрады. Былтырғы сәйкес кезеңмен салыстырғанда биыл бұл көрсеткіш 564 адамға немесе 2,3% - ға өсті. Ал 2021 жылы бұл көрсеткіш 23582 адамды құрады. Облыс аумағында ұлттық спорт түрлері бойынша 1 орталық жұмыс істейді. Қазіргі таңда облыста 19 ұлттық спорт түрі дамыған, - деді Қайрат Бурбасов.
Айта кетейік, жарыс бағдарламасындағы спорт түрлері бойынша арнайы репортаждар «Qazsport» телеарнасынан көрсетілетін болады.