"Ралли Қазақстан - 2018" басталды

Маңғыстауда 13 елдің, 64 қатысушысы бақ сынасатын "Ралли Қазақстан 2018" жол таңдамайтын көлік иелерінің жарысы басталды. Бұл жарысқа Қазақстанның атынан 7 сайыскер қатысуда. Бұл шара ҚР Мәдениет және спорт министрлігінің және Маңғыстау облысы әкімдігінің қолдауымен ҚР автомотоспорт Федерациясының ұйымдастыруымен өтуде. Халықаралық Автомобиль Федерациясының FIA Ралли Рейд Әлем Кубогы 27 мамырда басталып, 2 маусымға дейін өтеді.

Авто раллидің ашылу салтанатына Маңғыстау облысының әкімі Ералы Тоғжанов қатысып, жарыс қатысушыларына сәттілік тіледі.

«Елбасымыз Н.Ә.Назарбаев «Спорт – бейбітшілік пен татулықтың, ынтымақтастық пен тілектестіктің символы» деп атап өткендей спорт - қоғамның тірегі! Оны әрбір спортшы жүрегімен түсіне білу қажет. Сондықтан да салауатты өмір салтын ұстанатын қазақстандықтар жылдан жылға көбейіп келеді.Оны құрлық, әлем және Олимпиада жарыстарында қазақстандық спортшылардың бағындырған белестерінен нақты көруімізге болады», - деді облыс әкімі.

Сайыс бағыты алты кезеңге бөлінген, спортшылар 2500 шақырым жолды еңсеруі қажет.

Бірінші күні қатысушылар Ақтау қаласынан 210 шақырым оңтүстік-шығыста жатқан Кендірлі шипажайына барады. Келесі күні Сенек елді мекенін арқылы шөл даламен шығысқа, үшінші кезеңде Кендірліден шығысқа қарай жол жүреді. Жарыстың келесі кезеңінде Жаңаөзен қаласы арқылы Ақтауға оралады. Қатысушылар мәре сызығын 2 маусымда сағат 15.00-де Ақтау қаласында қияды.

Суреттерді түсірген Талант ҚҰСАЙЫН

[gallery td_select_gallery_slide="slide" ids="54639,54638,54637,54636,54640"]